Дачиќ: Не тргуваме со Косово за ЕУ

Белград - Српскиот министер за внатрешни работи и вицепремиер, Ивица Дачиќ, изјави вчера дека државата нема да тргува со националните интереси за да добие кандидатски статус за членство во ЕУ.

„Сите знаат дека Србија е подготвена да направи се' што е можно за да добие кандидатски статус за членство во ЕУ и датум за започнување преговори. Некој смета дека ова е идеален момент, откако Хашкиот трибунал веќе не е пречка, да се изврши притисок врз Белград во врска со Косово“, нагласи Дачиќ.

Белградскиот весник „Блиц“ вчера, повикувајќи се на извори од српската влада, објави дека Србија нема да добие датум за почеток на преговори со Унијата додека не се реши кризата во северниот дел на Косово.