Сугаревски oд затвор пак на работа во РЕК

БИТОЛА - Поранешниот генерален директор на РЕК „Битола“ и експратеник на ВМРО-ДПМНЕ, Владо Сугаревски, од затвор пак се врати на работа во РЕК. Сугаревски се сместил во рудникот Суводол преку Агенција за вработување и очекува наскоро пак да биде на платен список на комбинатот.

Ексдиректорот на РЕК-от, иако беше осомничен за злоупотреба на службената должност додека директоруваше со комбинатот, затвор издржа само за измама во службата. Како пратеник на ВМРО-ДПМНЕ, тој фалсификувал сметки дека на собраниски седници оди со приватно возило, а всушност патувал со службениот автомобил. На тој начин ги довел во заблуда стручните служби на Собранието. Парламентот во периодот од 1999 до 2002 година незаконски му исплатил над 378 илјади денари. Судот наложи Сугаревски да ги врати злоупотребените средства. Враќањето на работа во РЕК вчера го потврди и самиот Сугаревски.

„Одлежав шест месеци и 17 дена в затвор за парите од парламентот. Се' друго што ми ставија на грб дека сум ја злоупотребил службата додека сум бил директор на комбинатот, не беше вистина. И тогаш и сега тврдам дека тоа беше монтиран процес врз мене. Не знам зошто толку ве интересира ова, а никој не сакаше да напише дека додека јас бев директор на РЕК имав невидени резултати и успеси. Ако некој ги постигне тие резултати, јас ќе рипнам од оџакот на РЕК“, рече Сугаревски.

Судскиот процес против Сугаревски и неговите соработници со години се водеше пред судовите во Битола. Едно од најсилните обвиненија против Сугаревски, кое падна во вода, беше дека како прв човек на РЕК „Битола“ ја оштетил државата за 1.600.00 денари со тоа што, наводно, ја злоупотребил службената положба и на тендер за ископ на 800.000 квадратни метри јаловина и покрај тоа што имало и други понуди избрал фирми без бонитет. За оваа зделка, наводно, Сугаревски добил како поткуп ,,ауди А4“, вреден еден милиони денари. (А.Б.)