Битолчани ќе се греат на дрва

БИТОЛА - Жителите на Битола повторно ги запалија старите печки на дрва. Исплашени од поскапата струја откако битолска Топлификација пропадна и најголем број од колективните згради се откажаа од централно греење, граѓаните пресметаа дека најисплатливо е греењето со дрва.

Анализите на „Македонски шуми“ покажале дека во споредба со изминатите години, продажбата на огревно дрво во Битола и околината е зголемена од 15 до 20 проценти. Во една сезона битолчани трошат околу 60 илјади кубни метри огревно дрво.

„Дрвото е најевтин начин за греење. Потрошувачите се за заинтересирани за овој вид огрев и поради тоа што РЕК ‘Битола‘ веќе не испорачува јаглен за домаќинства“, објаснува Митко Стојановски, раководител на подружницата на „Македонски шуми“ во Битола.

Зголемената побарувачка на дрва во регионот не претставува проблем за „Македонски шуми“. Просторен метар даб чини 2.454 денари, цената на буката изнесува 2.372 денари, а сечениците се продаваат по 1.711 денари. Битолчани се интересираат и за греење со пелети. (А.Б.)