Претходен број

Нов фронт меѓу Костовски и Владата

Во владината акција за чистење на Вардар се ангажирани јавни претпријатија од Скопје без одобрение на градоначалникот

Билјана Ангеловска

Градоначалникот на Скопје, Трифун Костовски, отвори нов фронт против Владата. Завчера го разреши раководителот на Секторот за комунални дејности, Зоран Лапевски, поради тоа што без негово одобрение ги ангажирал градските јавни претпријатија да учествуваат во акцијата за чистење на коритото на реката Вардар што ја организираше Владата.

Костовски, лут бидејќи бил прескокнат, со разрешувањето на првиот човек на градскиот Сектор за комунални работи практично испраќа порака до сите директори на јавни претпријатија, но и до раководителите на секторите во администрацијата на Скопје дека во иднина нема да толерира никакви слични излети без негово знаење. Лапевски си заминува од функцијата поради тоа што акцијата ја договарал со Министерството за транспорт и врски, а не со градоначалникот.

„Една добра идеја, чистење на коритото на реката Вардар, се претвори во дезорганизирана кампања, во арогантно потценување на законите и редот во работењето и во понижување на градската администрација“, се вели во соопштението што го испрати вчера Секторот за поддршка на градоначалникот на Скопје, потенцирајќи дека скандалот во односите Град - Влада е создаден од чисто партиско-политички причини.

Костовски ја обвинува Владата дека се меша во ингеренциите на Градот. Според него, акцијата не може да се спроведува без соодветна програма и проект и без да се знае кој ќе биде негов носител. Тој вели дека Градот Скопје нема пари за дополнителни трошоци на претпријатијата за чистење на кејот. Дотолку повеќе што Градот веќе потрошил 400 илјади евра за чистење на коритото на Вардар во Скопје, а Владата сега повторно ги чисти истите места. Оттаму, градоначалникот прашува кој ќе преземе одговорност за тоа што двапати се трошат пари од граѓаните за една иста работа.

„Ова не е првпат да се инфилтрираат работи. Со оваа благородна акција се дезавуира и се понижува Градот, а јавните претпријатија се третираат како сопственост на Владата, а не на Градот Скопје. Затоа нашата реакција е сосем нормална и без никакви претензии. Јас не сум за влошување на односите со Владата, но барам ред и поредок во државата, особено на релација Град Скопје - Влада“, вели градоначалникот на Скопје, Трифун Костовски.

Претседателката на Советот на Скопје, Ирена Мишева, која е од редовите на ВМРО-ДПМНЕ, пак, отворено се стави на страната на Владата и го обвини Костовски дека не знае да се справува со функцијата градоначалник.

„Тоа што веројатно се случени одредени пропусти во комуникацијата во самата градска управа, односно помеѓу управата и градоначалникот, не е проблем со кој треба д�� се занимава централната власт. На акцијата и' претходеле неколку средби помеѓу одговорни лица од Градот Скопје, а дали за сето тоа бил информиран или не градоначалникот, не е пропуст на централната власт“, рече Мишева.

И ВМРО-ДПМНЕ е на иста линија со Мишева. Партијата на власт не се согласува со одлуката на градоначалникот да го разреши раководителот на градскиот Сектор за комунални дејности само поради тоа што, како што велат, „си ја завршил својата обврска и ја сработил задачата“. ВМРО-ДПМНЕ ја информира јавноста дека Владата и без Трифун Костовски ќе ја заврши докрај акцијата за чистење на коритото на Вардар. Од главниот организатор на акцијата, пак, Министерството за транспорт и врски, немаат објаснување зошто не било контактирано со градоначалникот Костовски. Од градскиот Сектор за поддршка на градоначалникот се потенцира дека намерно се создава клима на драматична криза во односите Град Скопје - Влада, со цел да продолжи „политичкиот линч“ на Костовски.

Ова не е првпат градоначалникот на Скопје да дојде во директен судир од Владата. Пред само половина месец Костовски отворено се спротивстави на едностраната одлука на централната власт да го поништи тендерот за набавка на 45 нови едноподни автобуси за јавниот превоз на Скопје и нејзината решеност да купи двокатни автобуси. Бидејќи и оваа владина одлука беше донесена без негово знаење, а во договор со директорот на ЈСП „Скопје“, градоначалникот експресно го смени првиот човек на претпријатието и назначи нов и притоа јавно се закани дека ќе му наложи на ЈСП да ги врати парите што ги даде Владата за набавка на нови автобуси.

Костовски се конфронтираше со Владата и кога отворено се спротивстави на одлуката да се гради црква на плоштадот „Македонија“. Дека не се шегува кога вели дека последните измени на ДУП „Мал ринг“ со кои се дава зелено светло за изградба на црквата, но и на уште неколку други објекти во срцето на градот, се донесени по незаконски пат, градоначалникот докажа така што изменетиот ДУП го даде на Уставен суд. (Б.А.)