Претходен број

Тежок инцидент по мечот Вардар - Ренова

Вардар ја победи Ренова со 3:1, но по средбата дивееја навивачите, при што тројца полицајци беа повредени, а 21 лице се приведено

Миодраг Мицковиќ


Една прекрасна фудбалска атмосфера на Градскиот стадион, добрата игра и убедливата победа на Вардар во мечот со еден од кандидатите за висок пласман, тетовската Ренова, ја расипа тешкиот инцидент што се случи по завршувањето на натпреварот. Повторно бевме сведоци на недоличното однесување на двете навивачки групи, невкусно скандирање, запаленото албанско знаме што резултираше со отворен судир меѓу навивачите надвор од трибините, покрај Градскиот стадион. За среќа, благодарение на брзата интервенција на полицијата и мобилните единици на „алфите“ беше спречен потежок инцидент што можеше да има несогледливи последици.

Се' почна по досудениот пенал за Ренова во 87 минута кога почнаа пожестоки вербални дуели меѓу навивачите на Вардар и Ренова. Во тие моменти полицијата брзо интервенираше и не дозволи да дојде до тепачка на трибините, но, веднаш потоа надвор од стадионот почна физичката пресметка, имаше повредени и навивачи и полицајци. Според извештајот на МВР уште на трибините почнала жестоката расправија меѓу навивачите кога група навивачи на Вардар предводена од водачот на комитите почнала да фрлаат со шишиња и камења при што бил физички нападнат и повреден еден полицаец кој беше пренесен во Ургентниот центар. По завршувањето на натпреварот, како што стои во соопштението, дел од навивачката група на Ренова влегле во возила и се упатиле кон излезот од Градскиот парк при што кај надвозникот под самиот Градски стадион биле пресретнати од поголема група на Комити кои фрлале со камења и разни предмети по нив. Тука биле и запрени со возилата при што било забележано дека две лица од групата на Ренова во рацете држеле пиштоли. Во тој момент од страна на мобилната единица на „алфите“ и полицајците било интервенирано при што во возилата се пронајдени пет пиштоли, а лицата биле приведени во полициската станица Центар. Исто така, се вели во соопштението од МВР, непознати лица од групата Комити со камен во пределот на главите биле повредени уште две службени лица кои се пренесени и задржани на лекување во Ургентниот центар. Покрај овие две полесно е повредено уште едно лице. При каменувањето оштетени се и две патнички возила во сопственост на претседателот на Ренова и неговиот син. Веднаш по смирувањето на инцидентите во полициската станица центар приведен е и припадникот на групата Комити за кого постојат сомневања дека го нападнал и повредил и полицаецот во првиот инцидент. Покрај него приведени се уште 20 лица, а се преземаат мерки за целосно расчистување на случајот.

За жал тоа е почетната приказна за овој првенствен натпревар кој имаше неславен крај и доколку не беше брзата интервенција на полицијата и на „алфите“ се' можеше да се случи. Со еден збор непотребен инцидент бидејќи освен тие вербални дуели на трибините немаше причини за него доколку не дојдеше и до блиската средба меѓу двете навивачки групи пред самиот стадион. Но, тоа е тоа, инцидентите на нашите фудбалски терени зачестија, острите казни за виновниците не помагаат бидејќи потоа казните се намалуваат од страна на комисиите во Фудбалската федерација.

Наместо да го почнеме извештајот со новата убедлива победа на Вардар со која докажа дека е навистина фаворит број еден за титулата, моравме извештајот да го почнеме со инцидентот што навистина загрижува.. Вардар, еве веќе на трет меч едноподруго ги тресе со по три гола мрежите на своите конкуренти за висок пласман. Победа и Пелистер беа испратени од Градскиот стадион со по 3:0, Ренова исто така, но со забелешка дека таа постигна барем еден гол. Вардар некако како по традиција на првите натпревари во годинашново првенство игра послабо во првото полувреме, како да ги испитува силите на своите противници а потоа со невидена офанзива ги дотолчува во вториот дел неоставајќи им шанса да го изненадат.

Немаше многу шанси во првиот дел освен на Јанчевски во 9 минута кога биеше со глава покрај голот на Ковачевиќ. И кога се чинеше дека на одмор ќе се замине без голови, во судиското продолжение, Милисављевиќ центрираше од левата страна, голманот на Ренова Ковачевиќ несмасно интервенираше, ја одби топката која го погоди Муса Али во грбот и се најде во мрежата.

Вардар се разигра во второто полувреме, во 63 минута по брзата акција на Баевски, Милисављевиќ убаво се ослободи од Станковиќ и со прецизен удар го совлада Ковачевиќ. Девет минути подоцна во листата на стрелците се запиша и младиот Петров кој го искористи слободниот удар на Глигоров, го измами Станковиќ и од непосредна близина ја затресе мрежата на Ренова која во текот на сите 90 минути играше дефанзивно, овозможувајќи му на Вардар да доминира на теренот. Единствената шанса Ренова ја искористи во 87 минута кога Вајс го собори Трајчев, а судијата Петковски оправдано покажа на белата точка. Пеналот успешно го реализира Емини, а Пачовски по 267 минута конечно беше совладан во годинашново првенство.

Вардар - Ренова



Скопје. Градски стадион. Судија Зоран Петковски од Велес. Стрелци: Муса Али во 45, Милисављевиќ во 63 и Петров во 72 минута за Вардар, а Емини во 87 минута од пенал за Ренова.

Вардар: Пачовски, Станишиќ, Божиновски (Брага), Милисављевиќ, Вајс, Љубисављевиќ, Мегленски, Али, Глигоров, Јанчевски (Баевски), Масев (Петров).

Ренова: Ковачевиќ, И. Стојанов, Мемеди, Деспотовски, Трајчев, Нухиу, Тодоровски (П. Стојанов), Емини, Ибраими, Али (Андоновски), Исмаили (Станковиќ).