Претходен број

ДПА и ДУИ се за признавање на независно Косово

Во ДПА сметаат дека позицијата на ДУИ во Владата е „премногу инертна, бедна и срамна“

Демократската партија на Албанците и Демократската унија за интеграција се залагаат за што поскоро признавање на независноста на Косово. Двете партии од албанскиот блок сметаат дека е неопходно донесување собраниска декларација за признавање на Косово.

ДПА на седница на највисокото партиско тело го услови враќањето во парламентот со што поскоро донесување нов, партиски закон за употреба на јазиците. Но, тоа не е единственото барање што го поставува партијата на Мендух Тачи. На списокот на приоритети на ДПА е и признавањето на Косово.

Експресна реакција и од Демократската унија за интеграција. Оттаму ја оценуваат за добредојдена идејата на ДПА да се предложи резолуција за признавање на Косово. ДУИ ја потсети ДПА дека за две години владеење не изразила „ниту најмал интерес“ да предложи закон за употреба на јазиците.

„Челниците на оваа партија упорно го попречуваа политичкиот дијалог ДУИ – ВМРО-ДПМНЕ, кој резултираше со договор помеѓу овие две партии за усвојување закон за службената употреба на албанскиот јазик“, стои во вчерашното соопштение од ДУИ.

Во партијата на Али Ахмети се убедени дека условите на ДПА претставуваат нова уцена врз политичкиот процес и обид да се попречи решавањето на отворените прашања кои ги загрижуваат Албанците во Македонија.

Централното претседателство на ДПА на затворената седница што се одржа во саботата во седиштето на партијата во Тетово одлучи да го продолжи бојкотот на Собранието.

„Нашата пратеничка група ќе се врати во парламентот тогаш кога предлог-законот за употреба на јазиците што го подготвува ДПА и декларацијата за признавање на независноста на Косово ќе бидат поставени на дневен ред“, изјави Имер Селмани, партиски потпретседател.

Селмани потенцира дека на седницата се разговарало и за моментната политичка состојба во земјата и притоа ја пренесе „длабоката загриженост на ДПА од застојот во евроатлантските интегративни процеси и во рамки на тоа интеграцијата на Македонија во НАТО и во Европската унија“.

Позицијата и учеството на ДУИ во Владата, Имер Селмани ги оцени како премногу инертни, а лидерот на ДПА, Мендух Tачи, како „многу бедни и срамни“. И Тачи ја критикуваше Владата затоа што, според него, не се ангажира колку што треба за интегрирање на земјата во евроатлантските структури и за примена на Охридскиот договор.

Челникот на ДПА најави дека партијата ќе продолжи да предлага закони и дека многу скоро ќе предложи Македонија да ја признае независноста на државата Косово.

„Сакаме да ги потсетиме нашите политички противници дека станаа глувонеми, затоа што преземените обврски треба и да се извршат“, наглас�� Тачи.

Инаку, пратеничката група на ДПА апстинира од работата на Собранието веќе три месеци. На саботната седница на Централното претседателство првпат во својство на потпретседател беше Абдулади Вејсели, чиј дел од ПДП се приклучи кон ДПА. (К.Ч.-Г.Е.)