Претходен број

Политичката елита очекува расправа во Собранието

Кога ваква поддршка доаѓа од најголемата светска сила, нема причина за колебање

Гордана Дувњак

Најголемата држава во светот упати силна порака до Македонија дека и натаму останува нејзин најголем сојузник кој сака да ја види со полноправно членство во НАТО. Последните изјави на претседателот на САД, Џорџ Буш, од Загреб, кои претставуваат дополнително охрабрување за македонското водство поскоро да ја отстрани и последната пречка и да го затвори прашањето со името. Вака ги разбра американските пораки македонската политичка елита, која очекува дека во текот на оваа недела државниот врв ќе се обрати во Собранието за да се изгради заеднички став околу идните чекори што треба да се преземат натаму.

Социјалдемократот и експремиер Владо Бучковски пораките од Загреб ги сфаќа како „последна опомена за Македонија“. Тој смета дека на најдобар начин треба да се искористат преостанатите седум месеци од мандатот на актуелниот претседател на САД, Џорџ Буш, за конечно да се затвори прашањето со името, зашто во спротивно можеме да останеме најизолираната земја во Европа.

„Пораките ги разбрав повеќе како охрабрување до Груевски и ВМРО-ДПМНЕ за да разберат дека не се битни личните кариери, туку иднината на земјата. Зборовите на претседателот Буш беа продолжение на пораката на Даниел Фрид од пред еден месец дека на Македонија повеќе од кога било и' е потребно лидерство. А во Македонија се знае дека моментно има двајца лидери - Црвенковски и Груевски. Од нив се очекува да покажат решителност. Вистинскиот лидер не може да се крие зад волјата на народот, туку од него се очекува да понуди решение.

Според потпретседателот на ЛДП, Андреј Жерновски, со последните изјави американскиот претседател, всушност, покажал дека иако Македонија де јуре не е во НАТО, сепак, тој де факто ја смета и натаму како дел од јадранската тројка.

„Изјавите на првиот човек на САД доаѓаат во битно време, бидејќи неговите пораки не се упатени само до македонската јавност туку повеќе до нашите соседи, за да им се каже дека Македонија и натаму има силен партн��р кој ги гарантира нејзината стабилност и независност“, потенцира Жерновски. Тој очекува државниот врв колку што може поскоро да се состане во поширок состав и да ја дефинира новата стратегија како да се постапува натаму.

„Од она што можев да го видам во Загреб, заклучувам дека САД остануваат цврсто на својот досегашен став и сакаат да ни помогнат колку што може поскоро да се реши проблемот со членството во НАТО“, вели лидерот на Либералната партија и коaлиционен партнер во власта, Стојан Андов. Тој додава дека кога ваква поддршка доаѓа од најголемата сила во светот, тогаш нема причина за натамошно пролонгирање на проблемот, туку колку што може поскоро да се продолжат преговорите за изнаоѓање компромисно решение.

И Андов, како и другите соговорници, се надева дека првите луѓе во државата што поскоро ќе го запознаат Собранието со деталите од последниот Самит на НАТО во Букурешт и ќе се изгради консензус и заедничка позиција околу продолжувањето на преговорите за името.

Слично размислува и лидерот на НСДП, Тито Петковски, кој нагласува дека реторичката поддршка на претседателот на САД треба да се разбере како силен гест на пријателство и решеност да не' видат во НАТО.

„Американците сакаат да не' охрабрат во нашите напори да истраеме и да го решиме ова прашање кое се влече веќе 17 години. Не сум многу голем оптимист како ќе успееме во нашата намера, затоа што кога ним не им успеа да ја разубедат Грција, не знам како ќе ни успее нам да се договориме и да изнајдеме компромис“, додава Петковски.

Сепак, тој очекува државата да изгради заеднички став околу натамошните преговори, бидејќи ако почнат надмудрувањето и препукувањето за тоа кој е виновен, нема ништо да се постигне и ќе се испрати многу лоша порака.