Претходен број

Мислења

Да не провоцирате Грк, а да кажете дека сте Македонец

Синоличка Трпкова

Непреговарањето е рамно на самоубиство. Тој што не мисли така - не сака да ја види Македонија во Европа

Го изразувам моето огромно жалење поради настаните во врска со нашите НАТО-аспирации. Верувам дека овој тажен момент го делам со уште два милиона граѓани на Република Македонија. Како дел од нив чувствувам лична одговорност поради нашиот „неуспех“ во смисла на мојата (нашата) неможност да влијаам врз какви било случувања. Сите сме лути, емотивни и фрустрирани.

Имам две причини поради кои го пишувам ова: првата, се чувствувам како дете без родители во раната фаза од својот живот кое треба да ја понесе одговорноста за својата иднина; втората, од моментот на моето враќање секојдневно сум конфронтирана со неактивност, индиферентност, чекање да се случи чудо, игнорирање на тоа што е многу прогресивно и бара многу ангажман. Овие карактеристики како да станаа синоним за нашата живејачка.

Јасно е дека Македонија постои само и само благодарение на трпеливоста, кроткоста, толерантноста и цивилизираноста на македонскиот народ. Тоа е неспорно. Јасно е дека сите сакаме ЕУ и НАТО- интеграција. Јасно е и важно, исто така, дека сме единствена мултиетничка земја на Балканот, во вистинска смисла на зборот. Во контекст на ова, сите наши двоумења и стравови од Албанците треба да ги оставиме зад себе. Моето лично чувство ми вели дека кај некои од вас тоа се' уште го има и дека народот го чувствува тоа, но и рефлектира. Вие сте како родители – децата нема да го прават она што им го велите вие, туку она што вие го мислите и правите. Вие сте како на рендген- апарат. Камерата ги бележи сите ваши мисли, дури и оние најскриените. Затоа повеќе од пожелни се вашите добри актерски способности.

За почеток замислете дека немаме повеќе никаков проблем со Албанците (што е и вистина). Од таа позиција да им се обратиме на Грците. Ќе видите колку поедноставно ќе ви биде да комуницирате.

Мојата најголема забелешка до вас е (ако смеам да си дозволам) немање проактивен став во однос на прашањето за името (македонскиот идентитет). Пасивноста, кроткоста и малиот знак на добра волја што беа покажани при последниот предлог на Нимиц од ваша страна се само мала појдовна основа за оние вистинските преговори што треба да се случат допрва.

Сега ВИЕ треба да ја започнете „војната“ за зачувување на нашиот идентитет, зашто вие сте родителите, а децата чекаат на вас. Офанзивата треба да се насочи кон Грција и светот со сите аргументи и факти за нашето постоење. На секое грчко НЕ да имате најмалку десет прашања и одговори кои веднаш, директно, непоколебливо, но пријателски ќе ги адресирате до нив. Да не им дадете простор да земат здив и да смислат контраудар. Таквиот став ќе ви даде уште повеќе сила и моќ, а најважно од се' – вашите деца ќе гледаат во вас со верба, респект, воодушевување!

Гледајте ги право в очи и не покажувајте никаков сомнеж за она што го правите и кажувате. Сомнежите го потхрануваат непријателот и го делат народот. Никој не сака да види сомнеж во вашите мисли – велам мисли оти тие се читаат (на камерата) повеќе одошто вие можете и да замислите.

Јас не сум експерт по историја и не сум преговарач. Тоа сте вие. Потсетете се на светската поговорка која вели: „Ти нема да го добиеш тоа што го заслужуваш, туку тоа за коешто ќе преговараш“.

Само едно оружје има 21 век – медиумот. И тоа е најсмртоносното оружје досега. Треба да знаете добро да го употребите - тоа е во ваши раце. Грците го направија тоа со застарени техники и методи, но им успеа. Зашто немаа сомнежи кои камерата прва ги регистрира. А кога немаш сомнеж во мислата, дури и најзастарената актерска техника изгледа уверливо.

Добра стратегија, една цел и консензус. Добра подготовка со добар тренинг. Амбиција - десет пати поголема од грчката. Први почнете- тоа е многу важно. Така ја водите работата. Вие бидете тие што даваат насоки и предлози. Подгответе одговори на сите невозможни прашања од Грците. Подгответе контраудари на сите нивни напади. Ако сакате „ова нека остане меѓу нас“- замислете дека сте чедата на Александар Македонски! Има сто и еден начин да не провоцирате Грк - а да кажете дека сте Македонец.

Никако немојте да се однесувате како „предавници“ на македонскиот народ, затоа што преговарате за името. За да се осигурате во тоа, разгледајте ги сите опции на непреговарање. Дали тоа нам ни помага? Во 21 век непреговарањето е рамно на самоубиство. Тој што не мисли така – или не сака, или не може, или не умее да ја види Македонија во Европа. Ова не е ниту турско, ниту античко време, а најмалку време на локални херои. Ова е време кога светските очи се вперени кон нас преку медиумите и чекаат чудо од потомците на Александар!

Многу вештина и нерви ќе бидат потребни за да ги „смириме“ Грците, да разувериме дел од светот и да излеземе како победници. Но, не заборавајте дека „никогаш не ти е дадена само желбата, а истовремено да не ти е дадена и моќта за нејзино реализирање. Меѓутоа, за тоа ќе мораш добро да се помачиш“ (Ричард Бах).

Ние сме Македонци, зборуваме македонски и ја сакаме Македонија! Искушението, маката и истрајноста се нашите сестри, а просперитетот, мирот и стабилноста се нашите зачнати деца: „дозволете да ги доносиме, да ги родиме и да и' ги дариме на иднината на Македонија“.

(Авторката е доцент на Факултетот за драмски уметности )