ТВ ФОТЕЛЈА
Алсат знае
 РОБЕРТ Д. КРСТЕВСКИ
Телевизија Алсат М не престанува да ги изненадува гледачите во Македонија. Наспроти очекувањата дека целна група ќе и' бидат исклучиво Албанците, таа се' повеќе се врти и кон Македонците. Досега тоа го правеше главно со информативните емисии на македонски јазик, а од пред некој ден отиде уште подалеку со двојазичното покривање на Европското првенство во фудбал. Како сопственик на ТВ-правата за директните преноси од Австрија и од Швајцарија, Алсат М можеше да оди со коментар само на албански и никој ништо да не може да и' забележи од формалноправен аспект. Но, раководството на оваа ТВ-куќа веројатно почувствува дека концесијата на национално ниво морално го обврзува да ги направи преносите достапни и за мнозинството граѓани, со тоа што ќе се обезбеди коментар и на македонски.
Во пригодните емисии во живо, пак, со гостите во студиото се комуницира и на албански и на македонски, зависно од нивната етничка припадност, што претставува вистинска револуција во македонскиот етер. Единствениот пропуст од чисто практична гледна точка е немањето превод кога водителот им се обраќа на дел од гостите на албански. Тие што не го знаат тој јазик, а ги интересира видувањето на фудбалските стручњаци што го користат во емисијата, остануваат покуси за тој дел од информациите поврзани со настаните на првенството.
Овдешните љубители на најважната споредна работа на светот дополнително ги развеселува уште една револуционерна новина на овие простори, а тоа е воздржувањето од емитување реклами за време на натпреварите. Заслужува внимание и толеранцијата кон гостите со, условно речено, провокативна надворешност, каков што беше случајот со актерите Рубенс Муратовски, кој на качкетот имаше беџ со сонцето од Кутлеш (Грците го викаат Вергина), и Сашо Тасевски, кој носеше маичка со ликот на Александар Македонски и со натпис Македонија. Ништо страшно, би рекле, но и не многу вообичаено за медиум на албански.
Импресионира и визуелниот впечаток од студиото, ��ое е целосна спротивност на сивилото и на кич-сценографијата на Македонска телевизија во емисиите во рамките на кои одат преносите од Лигата на шампионите. Тука е и коментирањето на средбите од ЕП во тандем со експерти за овој спорт, одамна утврдена практика во сите електронски медиуми што се стремат кон минимум професионалност, а таква бездруго е и Алсат М.
Сето набројано ја прави оваа скопска телевизија своевиден пионер во македонскиот радиодифузен простор. Да не речам, ретка билка што треба грижливо да се негува токму поради интегративниот капацитет што го манифестира во едно општество на длабоко вкоренети предрасуди спрема различните од себе. |
