Мадона и Гај Ричи на чекор до развод?
Еден од најжестоките британски адвокати за развод Николас Мостин, најверојатно, добил зелено светло од Мадона да ја започне бракоразводната процедура со Гај Ричи.
Информацијата ексклузивно била потврдена на веб-страницата „Холи Моли“ од досега неименуван извор, кој изјавил дека Мадона пред десетина дена се сретнала со адвокатот Мостин во неговата канцеларија во Лондон.
Во документите, како причина за развод се наведува дистанцирањето на парот поради бројните обврски поврзани со работата.
Освен ова, и негативниот медиумски публицитет поради посвојувањето на момчето Давид придонел за раздор помеѓу сопружниците.
Истиот извор тврди дека Мадона и Гај немаат потпишано предбрачен договор, што значи дека режисерот може да приграби половина од богатството на Мадона. Таа само минатата година заработила 72 милиона долари.
Мадона не го избрала случајно Мостин, кој е познат по разводите кои се вистинско „ремек-дело“. Последниот бил на Пол Макартни и Хедер Милс, при што на славниот пејач успеал да му спаси неверојатни 100 милиони фунти од вкупниот износ, кој бил побаран како отштета.
Долготрајните гласишта за брачната криза помеѓу Мадона и Гај со ова очигледно добиле и конечна потврда, но, сепак, ќе се чека на официјално соопштение од селебрити двојката. |
