Откажано чествувањето на Свети Климент во Охрид

ОХРИД - Откажувањето на вчерашната свеченост по повод одбележувањето на денот на Свети Климент, патронот на Охрид, е скандал зошто за членовите на Советот на Општината поважни биле политичките и партиските интереси од големината на празникот. Мнозинството на Советот, на чело со СДСМ, не било задоволно од изборот на добитниците на највисокото општинско признание „Светиклиментовата награда“ и најавило дека нема да присуствува на свеченоста.

„По седницата на Комисијата за доделување на наградата „Свети Климент Охридски“ минатата недела претседателот д-р Томислав Тунтев, поднесе оставка. По оставката незадоволни од гласањето во Комисијата, советниците од СДСМ и коалиционите партнери ни најавија дека не се задоволни од изборот на добитниците и во знак на протест нема да учествуваат на свечената седница“, објаснува претседателот на Советот на Општината Охрид, Душко Јаковчевски. Додава дека неговата одлука да не се одржи свеченоста е помал скандал отколку да се одржеше само со присуство на советниците од ВМРО-ДПМНЕ.

Скандалот се случува во отсуство на градоначалникот Александар Петрески, кој е во Брисел на презентација на туристичките можности на Охрид на саемот што го организира ЕУ. „Градоначалникот Петрески не можеше да влијае на одлуката на Советот зошто е во Брисел, но и да беше тука ќе мораше да ја почитува зашто таа е донесена од страна на Советот на Општината која е надлежен орган за работењето на Комисијата за доделување на признанија“, вели Никола Малевски, портпарол на Општина Охрид.

Охриѓани се револтирани од откажувањето на свеченоста која за нив е непочитување на Свети Климент, патронот и зашт��тникот на Охрид. Некои институции и поединци веќе најавија дека ќе побараат промени во статутот на Општината со што наместо партиски луѓе во комисијата за наградата да бидат видни и потврдени непартиски личности. (С.И.)