Премиера на „Неверство“ од Харолд Пинтер во ЦК

Во Културниот центар ЦК, вечерва со почеток во 20.30 часот ќе се одигра премиера на претставата „Неверство“ од Харолд Пинтер. Режијата е на Нина Николиќ, а улогите ги толкуваат:Дарја Ризова, Благој Веселинов, Мартин Јорданоски и Ненад Митевски.

„Неверство“ е прва театарска претстава која Центарот за драмски уметности Т-ХАУС ја реализира од своето основање, и воедно е најава за театарската програма како дел од активностите на Културниот центар ЦК во 2010 година. Станува збор за драма која содржи многу автобиографски делови, односно се базира врз вистинска приказна од животот на авторот Харолд Пинтер. Токму затоа забележлива е апсолутна прецизност во текот на приказната и мајсторски изработена линија на дејството. Но кога ја гледаме драмата, која е поставена како сложена математичка равенка, не можеме, а да не му оддадеме признание на Пинтер за прецизната и цврста структура на драмата - речиси како да нема никаква интимна врска меѓу него и тие „имагинарни“ драмски ликови. „Неверство“ е драма од „крв и месо“, можеби и не само поради тоа што авторот многу добро ги познава ликовите, како и срцето на приказната, туку и затоа што е напишана со потребната дистанца, но и со потребната интимност. (Н.П.)