Србите ветуваат тетоважи за ново Дејвис куп финале

Србија е во транс. Нејзините тенисери триумфираа во Дејвис купот пред домашна публика во исклучително драматичното финале против Франција. По вториот натпреварувачки ден Србите губеа со 2:1, но во неделата Ѓоковиќ, а потоа и Троицки, се погрижија за целосен резултатски пресврт и победа над триколорите со 3:2 и така нашиот северен сосед стана 13 земја освојувач на Дејвис купот во 110 годишната историја на ова натпреварување.

Пред финалето, членовите на српската репрезентација ветија дека ќе се истрижат до гола кожа во случај на победа. Тоа што го ветија, го сторија, а веќе најавуваат дека ќе се тетовираат ако догодина се пласираат во големото финале.

„Горд сум на момчињата и на тоа со каков жар играат за својата татковина. Не случајно ја прифатив улогата на советник и не случајно бев дел од оваа екипа бидејќи воочив дека имаат срце и квалитет“, ја пренесува српски „Мондо“ изјавата на Хрватот Никола Пилиќ кој уште отсега е подготвен да потпише дека догодина Србија ќе игра против Хрватска во Дејвис куп финалето.