Пророкот Мухамед нема да биде во новото „Општество“

Министерот за образование, Никола Тодоров, вчера информираше дека сликите од пророкот Мухамед што се појавија во спорниот учебник по општество биле една од посериозните причини да се донесе одлука овој учебник да биде повлечен.

„Сигурен сум дека ваквите грешки нема да се повторат затоа што имаме формиран�� сериозен рецензентски тим што е посветен целосно на оваа работа“, изјави министерот. За ваквите грешки во учебникот реагираа и припадниците на Исламската верска заедница, бидејќи во исламот не е дозволено визуелно да се прикажува пророкот Мухамед.

Министерот како сериозни ги оквалификува обвинувањата на рецензентите проф. д-р Антоанела Петковска, м-р Соња Палчевска - Ќосева и Лилјана Стојановска дека „Министерството за образование манипулира со фактите во врска со учебникот по општество и дека рецензентите не добиле ниеден отпечатен примерок пред да биде објавен учебникот“.

„Сериозни обвинувања од рецензент, професор на Универзитет кој дозволил еден учебник со ваква содржина да биде одобрен, да биде пуштен во печатење. Најдобар демант и најдобар одговор за овие ставови на рецензентот е извештајот на тимот што изврши стручна суперрецензија на целиот учебник и едногласно одлучи да биде повлечен овој учебник“, изјави Тодоров.

Учебникот по општество беше повлечен откако во јавноста изби скандалот со популарната 42. страница, каде што како значајни културни дејци од македонск��та култура се споменати Нора Шаќири, Ферус Мустафов, Тони Михајловски. Суперревизијата на спорниот учебник покажала дека грешките за значајни личности од областа на културата биле минорни.

Новите рецензенти откриле катастрофални промашувања на авторите, бидејќи имало грешки во секое поглавје. Направената штета поради препечатување на овој учебник ќе чини еден милион денари. (О.В.)