Србите на МОТ гостуваат со мултимедијалниот проект „Чарнин пој“
Вечерва во рамките на МОТ, по премиерната изведба на „Мара/Сад“ во МНТ од 20 часот, следи претставувањето на Културмобил од Србија со проектот „Чарнин пој“, кој започнува од 22,30 часот во Младинскиот културен центар.
Станува збор за хибриден, граничен, мултидисциплинарен изведувачки проект, кој ги поместува границите на театарот. „Истражувајќи го прашањето на просторот и времето на изведување, односно помеѓу изведувачот и публиката, реалното и фиктивното, реалноста и глумата, претставата го поставува прашањето на сценското пространство. Целиот град се претвара во сцена, станувајќи партнер во играта“, се вели во каталогот за претставата.
Во рамките на придружната програма, напладне во МКЦ, селекторот на овогодишното издание на МОТ, Дамир Домитрович–Кос, ќе одржи предавање на тема „Современи театарски тенденции“. Во 18 часот, исто така во МКЦ, во рамките на програмата „Ѕвездите што доаѓаат“, ќе биде изведена претставата „ММЕ...“, во режија на младите Ристе Алексовски, Никола Ристов и Димче Николовски. (Л.М.) |
