„Јас сум од Титов Велес“ ќе се бори и за „Оскар“
Македонскиот филм „Јас сум од Титов Велес“ на Теона Стругар Митевска е годинашен кандидат за престижната награда „Оскар“, во конкуренција на филмови од неанглиско говорно подрачје. „Јас сум од Титов Велес“ бил и единствениот кандидат од Македонија за оваа награда. Како што во една прилика изјави продуцентката на филмот и актерка Лабина Митевска, одлуката филмот да се пријави годинава, а не лани кога и беше неговата премиера, била донесена со оглед на можноста најпрвин ова ново остварување на Теона Митевска да се претстави на фестивалите ширум светот, да освои признанија, да стане меѓународно познат. „Дури потоа“, рече Митевска, „да се обиде со оваа кандидатура, бидејќи така би требало да има поголеми шанси“.
Само да потсетиме, филмот „Јас сум од Титов Велес“ влезе во тесната селекција од 40 филма кои ќе се борат за годинашните номинации за големата европска филмска награда „Феликс“, која се смета за пандан на „Оскарот“. Овие награди се доделуваат на почетокот на декември. (Т.И.)
|
