Концертната сезона на Трпчески почна во Бирмингем
Со двата концерти во Бирмингем, Велика Британија, кои Симон Трпчески ги одржа на 23 и 24 септември, стартуваше новата сезона на македонскиот реномиран пијанист. Трпчески настапил како солист со Симфонискиот оркестар на Бирмингем (ЦБСО), изведувајќи го Концертот за пијано и оркестар бр. 2 од Камиј Сен-Санс, под диригентската палка на Андрис Нелсонс.
Синоќа пак, Трпчески одржал концерт на камерна музика заедно со музичарите од реномираниот оркестар на Бирмингем. Во официјалната програма на концертот, а по предлог на самиот Трпчески, се извело и традиционалното „Скопско оро“ во аранжман на пијанистот и композиторот Дамир Имери. Настапите на Трпчески со ЦБСО завршуваат вечерва со концерт во Бедворт, од каде нашиот мајстор на пијаното продолжува да настапува во Швајцарија.
На 5 октомври Трпчески ќе биде дел од екипата што на Градскиот стадион во Скопје ќе настапи со пиетет кон ликот и делото на Тоше Проески. Октомвриската агенда на Симон Трпчески веднаш потоа, е исполнета со серија концерти во Шкотска, во Единбург, Глазгов и Абердин, како солист на Шкотскиот камерен оркестар. (Т.И.) |
