Против Кина за финиш на сезоната

Јонуз потврди дека понудата на Кинезите е прифатена, останува да се допрецизира мал дел од деталите за мечот на 26 декември во близина на Хонг Конг

Сашко Ѓ. Димовски

Македонската фудбалска репрезентација своите активности за 2010 година, сепак, ќе ги заврши во декември. По пријателскиот меч со Албанија во Корча на 17 ноември, ќе следува уште еден и тоа со Кина на 26 декември во гратче во близина на Хонг Конг. Терминот е неофицијален и е надвор од календарот на Светската фудбалска асоцијација (ФИФА), но селекторот Мирсад Јонуз ќе се обиде да состави тим за нова квалитетна проверка на силите и можностите на националниот тим пред продолжението на квалификациите за ЕП 2012 и наредниот дуел во Б групата во Даблин против Република Ирска на 26 март.

„Начелно е се договорено. Ја прифативме понудата на Кинезите, договорени се најголем дел од деталите, останува да се допрецизира уште мал дел од нив. Поаѓаме на 23 декември, мечот е на 26, се враќаме на 27“, ни изјави Јонуз.

Кинезите не' пикираа како противник по мерка во нивните подготовки за настап на Азискиот куп на нациите. Селектор на националниот тим на најмногубројната земја во светот е Гао Хонгбо. Претстојниот дуел ќе биде трет меѓу Кина и Македонија. Во досегашните двад водство на Драган Канатларовски забележавме пораз (0:1) и реми (0:0). Еден од условите во кинеската понуда е да патуваме со сениорски состав што, веројатно, ќе биде запазен од наша страна, но дали тоа ќе биде А-тимот допрва ќе видиме иако тоа ќе биде тешко изводливо.

„Сите што беа дел од репрезентативниот список во изминатите година и половина ќе бидат повикани за дуелот со Кина. Но, не очекувам да бидеме комплетни со оглед дека мечот ќе се одигра во неофицијален термин, а во таквите ситуации клубовите немаат обврска да ги пуштат своите играчи доколку имаат обврски кон нив. Затоа очекувам да патуваме со сите слободни репрезентативци во тој период, оние, пак, што ќе бидат зафатени ќе бидат заменети со други играчи. Планирам да повикам и фудбалери од домашното првенство за дуелот со Кина, да ја воочам нивната форма, можности и квалитети и колку може да се смета на нив во иднина. Можеби нема да одиме во комплетен состав, но во секој случај тоа ќе биде тим блиску до првиот“, дополни Јонуз.