Никој не знае кај смее да се пуши

Никој точно не знае каде е дозволено, а каде е забрането пушењето, па дури ни луѓето што ги носат законите. Имено, вчера на дневен ред на собраниската Комисија за здравство на дневен ред се најде предлогот на група пратеници за измена на Законот за заштита од пушењето, со кои би се дозволило пушење на терасите и на бавчите, при што пратениците на власт покажаа дека тие не се во тек со правила што се во сила, а кои предвидуваат на надворешните простори да се пуши само од март до октомври.

„И сега е дозволено пушење на летните тераси и бавчи на угостителските објекти“, изјави Цветко Грозданов од ВМРО-ДПМНЕ, чудејќи се на барањето на опозицијата за вакви измени во забраната за пушење.

Предлогот на групата пратеници за олабавување на целосната забрана за пушење, што не беше прифатен од мнозинството пратеници, предвидуваше поголемите локали да одвојат посебни простории за пушење, а помалите да се определат дали ќе бидат само за пушачи или за непушачи.

Во образложението на Предлог-законот, Горан Сугарески од СДСМ рече дека предлагаат сопствениците на објектите со површина до 100 квадратни метри да можат да изберат дали објектот ќе биде целосно за пушачи или за непушачи, за објектите поголеми од 100 квадратни метри сопствениците да обезбедат посебен дел за пушачи во кој вентилацијата на воздухот во просторот за пушење ќе овозможува негова промена согласно со европските стандарди. Со предлогот се бараше пушењето да биде дозволено на летните тераси и бавчи на угостителските објекти, на стадионите на отворено за време на спортски и други јавни манифестации, во летните кина. (А.С.)