Бесплатната бања за пензионерите од февруари

Аплицирањето за бањско лекување треба да почне до крајот на месецов

Маја Томиќ


Владата ќе потроши околу 1,5 милион евра за бањско лекување на 10.000 пензионери. Тие во текот на една година ќе можат да престојуваат седум дена бесплатно, на државен трошок, во еден од седумте бањски центри во државата. Фондот за здравство има склучено договори со четири бањи за лекување: „Катлановска бања“ во Скопје, бањите „Цапа“, „Негорци“ во Гевгелија и „Банско“ во Струмица. Аплицирањето за бањско лекување би требало да почне до крајот на месецов, во јануари наредната година ќе се прави изборот, а во почетокот на февруари се планира првата група пензионери да бидат испратени на бања.

За да ја користат понудата, пензионерите ќе треба да исполнуваат одредени критериуми. На вчерашната средба меѓу министерот за труд и социјална политика, Џељаљ Бајрами, со претставниците на Здружението на пензионери и другите пензионерски организации, тој ги запозна со деталите на одлуката. Бајрами изјави дека оваа привилегија ќе можат да ја уживаат пензионерите од сите делови на државата, сразмерно на тоа во кој град колку пензионери има. Притоа, одлучувачки критериум ќе биде висината не пензијата, односно предност ќе имаат, најверојатно, корисниците на пониските пензии. Битна ќе биде и должината на користењето државна помош за нега на трето лице, која ја примаат значителен дел од пензионерите.

Инаку, од вкупно 270. 000 пензионери во државата, 33 отсто се со минимални пензии, до 6.000 денари. „Ќе гледаме да бидат опфатени сите краишта на Македонија. Сразмерно на тоа кој град колку пензионери има, толкав процент од нив, од вкупниот број - 10.000, ќе одат во бања. Ако, на пример, Скопје има околу 40 проценти од сите пензионери, толкав процент, од оние 10.000, ќе користат бањско лекување“, објасни Бајрами.

Најголем број од бодовите, односно до 60 бода, ќе носи висината на пензијата. Значи, повеќе бодови ќе има за пониските пензии. Аплицирањето ќе се врши во 30-те подрачни единици на Фондот за ПИОМ, а крајниот избор ќе го направи комисија составена од претставници на МТСП, од Владата, од Министерството за финансии, од Фондот за ПИОМ и од Фондот за здравствено осигурување.

„Планираме оваа можност да ја користат поголем број пензионери со ниски примања. До 30 бода ќе носи времетраењето на користењето на пензијата и уплатата на придонесите, што значи постарите пензионери ќе имаат предност. По 10 бода ќе има за оние пензионери што користат помош и нега од трето лице“, изјави Бајрами.

Тој додаде дека државата ќе ги покрива и трошоците за превоз, како и задолжителните здра��ствени прегледи. За време на бањско-климатското лекување, пензионерите ќе имаат обезбедено сместување и три оброци дневно.

Пензионерите, по вчерашната средба со Бајрами, беа задоволни од одлуката на Владата и од воспоставените критериуми. „Потегот на Владата е добар и добро се избрани критериумите. Ова на некој начин покажува дека некој се грижи за пензионерите. Ние, како здруженија, ќе се потрудиме да придонесеме критериумите да се почитуваат, онака како што се зацртани, односно навистина оваа можност да ја искористат оние што се најзагрозени и на кои им е најнеопходно бањското лекување“, истакна Чедо Георгиевски од Здружението на пензионери.

Владината идеја за бањите беше соопштена на јавноста завчера, по средбата во Владата меѓу премиерот Никола Груевски со претставниците на пензионерите. Груевски тогаш рече дека мерката е донесена по подолги консултации и пресметки, за што се обезбедени средства во буџетот, во висина од 90 милиони денари, или 1,5 милион евра. Според Груевски, на овој начин ќе заживее и бањскиот туризам во земјава.