Кој е првиот македонски милионер?

Драган Николовски го отвори финалното 15. прашање во квизот „Кој сака да биде...“, па се откажа освојувајќи 2 милиона денари

Катерина Шекеровска

Триесет и двегодишниот Драган Николовски од Куманово е првиот милионер во земјава кој во завчерашно издание на популарното квиз-шоу „Кој сака да биде милионер“ на телевизијата А1 успеа да освои 2 милиона денари. Николовски стаса до последното, 15. прашање, го отвори и се откажа, земајќи ја гарантираната сума од два милиона, и притоа пропуштајќи ја шансата да ја освои највисоката добивка која изнесува 4 милиони долари. Само момент потоа, тој точно одговори на милионското прашање „Кој француски филозоф е основач на деконструктивизмот?“

„Секој е генерал по битката“, ни рече Николовски, одговорајќи на прашањето дали му е криво што не ризикувал и не отишол докрај во освојување на највисоката парична награда во историјата на македонското издание на квизот „Кој сака да биде милионер“. Имајќи ги предвид првите впечатоци по завршување на квизот, тој вели дека е задоволен од тоа како се одвивале работите. „Во принцип сум презадоволен, иако од оваа дистанца сметам дека можев првиот дел од прашањата многу попаметно да ги изиграм. Сосема непотребно искористив џокер на шестото прашање, додека во вториот дел одлично ги одиграв прашањата, а имав и малку среќа со 11. прашање. Штом го одговорив тоа прашање, почнав и да се надевам дека можам да освојам нешто повеќе“, објаснува Николовски.

Милионерот од Куманово вели дека во моментот пред одговорот на финалното прашање решил да не ризикува и да се откаже. Иронично, но една минута потоа во слободното одговарање, тој одговори точно, а доколку не се откажеше, ќе добиеше 4 милиони денари. Сепак, задоволен е од освоената сума, која пресметано во евра изнесува околу 33.000 евра. „Се' уште не знам како би ги потрошил парите“, додава Николовски, кој по завчерашниот квиз води малку поинаков живот. „Ме препознаваат на улица, во автобус, на работа и ми честитаат“, објаснува инженерот по физика, кој работи, т.е. волонтира на Универзитетската клиника за радиотерапија и онкологија во Скопје.

Првиот македонски милионер од квизот „Кој сака да биде...“ живее во приградската населба Карпош (Рајкова куќа) во Куманово, роден е во 1977 година, не е женет и дипломирал на Природно-математичкиот факултет во Скопје. Има диплома на инжинер по физика и секој ден патува на релација Куманово - Скопје, каде што се надева на постојан работен однос на Клиниката за радиотерапија и онкологија. Ова му е второ учество во „Милионер“ - првиот пат стасал до 11. прашање (паднал на прашањето „Од каде потекнува кафето „мока“), а досега учествувал на повеќе квизови, како што се „Енигма“, „Сепак се врти“, „ТВ-крстозбор“... Негова девиза е „живеј и остави ги другите да живеат“, сака да пешачи, да спортува, обожава тенис... „Кој сака да миде милионер“ и освоените 2 милиона денари се негов најголем успех досега.

„Драган покажа прекрасна сталоженост по 10. прашање. Во почетокот беше стегнат, но потоа сфати дека нема што да изгуби и оди само напред. Тој не само што точно ги одговори прашања, туку покажа и одлично знаење и умешност во објаснувањето на самите одговори“, ни изјави Игор Шокаровски, продуцент на квизот „Кој сака да биде милионер“.

Инаку, во Македонија досега е отворено седум пати прашањето за 500.000 денари, а ова е првпат некој да го отвори 15. прашање, па да се откаже. За споредба, во Хрватска досега два пати е погодено 15. прашање, а во Србија само еднаш.