Поглед

Убав ден во Самобор

Kатерина Богоевска

Викендот што помина треба да биде забележан како викенд за паметење.

Во хрватски Самобор беше промовиран репринтот на стихозбирката „Бели мугри“ од Кочо Рацин, а беше откриена и биста на овој надалеку познат македонски поет и револуционер.

Убаво беше да се види, макар и преку телевизиските екрани да се доживее, како Самобор со голем респект му приоѓа на делото на Рацин. Како со особен пиетет се говори за големината на неговото творештво, за моќта на длабоко визионерската, поетска мисла која во овој град била забележана и пред 70 години, кога таму прв пат е и отпечатена вредната збирка поезија.

Празници се деновите што ја покажуваат светлата човекова страна. Минатиот викенд се празнуваше моќта на културата и уметноста во градот кој и именувал една улица со името на Рацин. Големината на поетот и вонвременското траење на поезијата, и по сто години од неговото раѓање, ги спои на едно место и градоначалниците на Самобор и на Велес, академиците од Македонската и од Хрватската академија на науките и уметностите, интелектуалците, писателите, уметниците, проучувачите и почитувачите на делото на Рацин, новинарите.

Космополитскиот дух на Кочо Рацин е препознатлив и денеска. Вткаен е во неговите стихови, во начинот на кој живеел и се борел за иднината на граѓаните, без разлика на нивната етничка и социјална припадност.

Препознатлив е по начинот на кој луѓето и денеска му припаѓаат на неговото дело. За нас овде во Македонија од огромно значење е што Кочо Рацин на вистински начин е присутен во Самобор, град кој исто така е познат по широчината на духот на своите граѓани. Таков е и Самобор, но таков е и Велес, родниот град на Рацин. Не случајно минатиот викенд заедно празнуваа.