Распродажба на државни компании

Атина - Грција објави гигантска приватизациона програма во износ од седум милијарди евра за да се справи со кризата, објави електронското издание на атинскиот весник „Та неа“.

Програмата вклучува распродажба на компании со државно учество од железничкиот и автомобилскиот транспорт, на атинскиот аеродром Елиникон, на водостопанството и комуналните компании, на поштите, едно казино, на државната лотарија, како и давање под концесија на пристаништа и автомагистрали.

Целта на Владата е за три години да собере седум милијарди евра. Приватизацијата се наложува поради ангажмани, преземени заради заеми за спас од финансиската криза.

Првата милијарда од приватизационата програма треба да биде собрана првата година, додава весникот. (МИА)