„Митот за Сара“ се навраќа на Првата светска војна

Режисерот Саша Станишиќ ќе ја оживее приказната за доаѓањето на легендарната Сара Бернар во краткиот филм што се снима во Битола и во Мариово

Деновиве во Битола и нејзината околина ќе се доснимува краткометражниот игран филм „Митот за Сара“ во режија на Саша Станишиќ, чие снимање почна на 17 декември во Скопје. Сценариото за овој филм, кој се занимава со митот за доаѓањето на легендарната француска актерка Сара Бернар на македонскиот фронт на Кајмакчалан, го напиша актерката и театролог Кристина Христова - Николова.

Како што вели режисерот Станишиќ, филмот ќе се обиде да ја долови атмосферата на воена Битола од 1917 година и целиот ќе се снима во црно-бела техника. Раскажувајќи ја приказната за посетата на Сара Бернар на француските војници на македонскиот фронт, филмот ќе се обиде да се осврне на легендата за првата жена што го играла Хамлет, а наедно низ архивски кадри ќе се наврати и на Првата светска војна. Сара Бернар на почетокот на 20 век била славена како најголем драмски уметник на своето време. Интересно е дека првпат на филм ќе игра токму во улогата на Хамлет во „Хамлетовиот двобој“, а подоцна ќе игра во повеќе филмови инспирирани од нејзините театарски претстави. Сара Бернар се сметала за божествена и за гениј на францускиот театар.

.За улогата на бесмртната Сара Бернар ангажирана е Јоана Поповска, доајен на македонското глумиште, а покрај неа игра и Александар Копања, кој за првпат настапува во македонски филм. „Митот за Сара“ освен во Скопје и во Битола, се снимаше и во околината на селото Маково во Мариово. За директор на фотографија ангажиран е македонскиот мајстор на фотографијата, Роберт Јанкуловски, монтажата ќе ја работи Блаже Дулев, костимограф е Благој Мицевски, сценограф Петар Трајчевски, а музиката ќе ја подготви Маријан Нечак. Продукцијата е на „КТ Филм и Медија“ односно на Димитар Николов - Таки, а постпродукцијата на „Квазар филм“. Инаку, во студијата на „Квазар филм“ и на Универзитетот ЕСРА предвидено е да се прават и визуелните ефекти. „Митот за Сара“ го поддржа македонскиот Филмски фонд. (С.У.)