Премиера на велешкиот театар

Народниот театар „Јордан Хаџи Константинов-Џинот‘‘ во Велес вечерва премиерно ќе ја изведе претставата „Злосторството на островот на козите‘‘, повоена драма на италијанскиот писател Уго Бети, во режија на Дејан Дамјановски.

Дејството се случува во 50-тите години од 20 век на еден сиромашен остров на југот на Италија. Претставата е изведувана низ светот, а во Македонија прв пат беше режирана од Зоја Бузалкова и изведена во 2002 година од студенти на ФДУ од Скопје. Ова ќе биде прво претставување на професионална театарска сцена во Македонија.

„Станува збор за едно конкретно злосторство што се извршува на еден запуштен остров, изолиран од светот. Тоа е почва за нашата претстава што по формата би ја нарекле еден вид фарса за ужасот што човекот го чувствува и обзема кога ќе се погледне во огледало, кога ќе се соочи сам со себе“, вели режисерот Дејан Дамјановски. Во претставата играат Слободанка Чичевска, Кица Ивановска, Кети Борисова, Роберт Ристов, Самоил Стојановски и Кирил Гравчев. (К.Р.)