Вацлав Хавел режира филм во кој главна улога има неговата сопруга

Експретседателот на Чешка, Вацлав Хавел, во јули ќе почне со снимање на долгометражниот филмот „Заминување“, со што првпат на 73-годишна возраст ќе се испроба во улогата на режисер. Интересно е дека главната женска улога во интимната драма, која Хавел ја режира, според негова истоимена театарска претстава, која првпат беше прикажана во мај во 2008 година, ќе ја игра неговата сопруга Дагмар.

„Јас потекнувам од делумно филмско семејство, мојот вујко е еден од основачите на чехословачката кинематографија и нашето семејство ја изгради палатата ’Луцерна‘, каде беше првото прашко кино“, вели Хавел и признава дека под влијание на семејството од мал имал желба да биде режисер, но политичките околности го спречиле во тоа.

Сега Хавел, кој е драмски писател и познат дисидент од времето на студената војна, ги ужива пензионерските денови и со полна сила се впушта во нови уметнички искуства.

„По долго двоумење ќе му се посветам на филмот дури сега, како што се вели, на крајот на мојата јавна кариера. Всушност, би сакал првпат во животот сам да ја интерпретирам својата драмска материја. Јас за филмот имам прилично точна слика, ја сакам работата, имам добри соработници и одлични актери. Сакам своето релативно неискуство да го претворам во позитива и се надевам така полесно ќе избегнам разни клишеа и конвенции“, зборува Хавел за својата нова уметничка ролја.

Филмот „Заминување“, чија тема е тешката разделба со моќта, својата премиера на големото платно ќе ја има на пролет идната година.