Прво одбележување на Светскиот ден на хармониката

Од минатата година од страна на Светската унија на хармоникашите - членка на УНЕСКО, 6 мај е прогласен за Светски ден на хармониката. Причината за овој ден да биде прогласен за Ден на хармониката е датумот на кој пред 181 година прв пат е патентиран инструментот хармоника. И оваа година кон празнувањето на овој датум и активностите што ги имаат хармоникашите од целиот свет, а координирани од Светската унија на хармоникашите, се приклучи македонското Здружение „Љубители на класичната музика“ од Скопје со организирање на Свечен концерт во Даут-пашин амам, со почеток во 20 часот. На концертот ќе настапат ученици од ДМБУЦ „Илија Николовски-Луј“ и студенти од Факултетот за музичка уметност од Скопје од класата на професорката Зорица Каракутовска, добитници на голем број престижни награди во земјата и странство.

Професорката Каракутовска е претседател на македонското Здружение на хармоникашите и член на Музичкиот комитет на Светската унија на хармоникашите. (Н.П.)