Откриена цивилизација стара 20.000 години во Тајван
Цивилизацијата најверојатно била од луѓе со темна кожа
ТАЈПЕЈ - Истражувачи во Тајван ја пронајдоа, како што се верува, најстарата цивилизација на островот, која датира уште од пред 20 илјади години, и му припаѓала на пигмејски народ ,кој дошол од Кина, југоисточна Азија, или подалеку, изјави вчера лидерот на тимот. Претставници од државната академија „Синика“, која пронајде повеќе од 200 камени алатки на локацијата, пештерата Ба Хсеин, каде што се извршуваа ископувањата, на источниот брег на островот, ќе се вратат следната година за да најдат индиции за тоа кој живеел тука, изјави лидерот Тсанг Ченхуа.
Цивилизацијата најверојатно била од луѓе со темна кожа, слични на негритос, термин што опфаќа неколку етнички групи со мал раст во изолирани делови од југоисточна Азија, открива Тсанг. И понатаму останува мистерија нивното точно потекло и миграцијата во Азија. „Добро прашање е од каде потекнуваат тие. Ние предложивме да се наречат негритос, меѓутоа, се' уште не најдовме човечки череп“, вели Тсанг. „Мора повторно да се вратиме за да откриеме дали тие се од Кина или од Индокинескиот Полуостров“. Тајванските негритос, чиј број едно време изнесувал 90.000, кои сега се исчезнати, најверојатно пристигнале до Тајван од Мадагаскар, преку островите на југоисточна Азија, посочуваат некои научници. Други, пак, веруваат дека тие дошле од Кина, 160 километри оддалеченост низ Тајванската Теснина. Денес етничките Кинези се расно мнозинство во Тајван. (Ројтерс) |
