Обама е лут поради апсење црн професор
Полицијата во САД има долга историја на несразмерен однос кон Афроамерикaнците, рече претседателот
Американскиот претседател Барак Обама изјави дека полицијата од Кембриџ се понела „глупаво“ кога го уапси Црнецот Хенри Луис Гејтс, еминентен професор на Харвард, пред неговата куќа. Директорот на институтот за африканска и афроамерикански студии на Харвард е уапсен минатата недела пред неговиот дом откако една жена повикала полиција и навела дека двајца Црнци, професорот и неговиот возач, се обидуваат да влезат внатре. Станува збор за област претежно населена со белци. Професорот им ги дал личните документи за полицијата, по што бил уапсен.
Обама изјави дека полицијата во САД има долга историја на поинаков, несразмерен однос кон Афроамериканците и Латиноамериканците. „Не ги знам сите детали, но мислам дека е в ред да истакнам, како прво, дека секој од нас би бил многу лут. Второ, полицијата од Кембриџ се однесуваше глупаво бидејќи уапси некого, а имаа доказ дека се наоѓа во неговата куќа“. Обвиненијата подоцна беа повлечени, а полицијата од Кембриџ го нарече апсењето „несреќно“ , а случајот „за жалење“.
Професорот Гејтс изјави дека бил запрепастен поради апсењето и полицаецот кој му ги стави лисиците на рацете го нарече „никаквец“. Полицаецот одби да се извини поради погрешното апсење. За време на конфронтацијата Гејтс коментирал: „Ова е тоа што им се случува на Црнците во Америка“. Адвокатот на професорот објасни дека Гејтс само што се вратил од патување и по доаѓањето дома со возачот открил дека предната врата му била заглавена, па морал да провали внатре. Кога пристигнала полицијата, тие двајца биле во куќата. |
