Хеликоптерско бегство од белгиски затвор
БРИСЕЛ - Тројца затвореници побегнаа од белгиски затвор во драматично бегство со киднапиран хеликоптер. Меѓу нив е и ограбувачот на банки, Ашраф Секаки, кој избега од друг затвор пред пет години, се наведува во информациите. Официјалните лица посочуваат дека хеликоптерот слетал во затворот во близина на Бриж, ги собрал затворениците и ги оставил на 20 километри оддалеченост, во близина на главен автопат. Тие последен пат биле видени како се упатуваат кон брегот во украден црн „мерцедес“ откако ограбиле бензинска станица.
Секаки (26) се опишува како еден од најопасните криминалци во земјата. Нему му се изречени повеќе од 16 пресуди, вклучувајќи една за киднапирање. Хеликоптери беа користени во голем број дрски бегства од затвор во минатото. Во 2007 година Белгиецот Нордин Баналал избега од затвор надвор од Брисел откако вооружени лица со хеликоптер влегоа во него. (Би-Би-Си)
|
