Јанчевски: Ќе поевтинат кредитите

Првиот генерален директор на НЛБ Тутунска банка, Ѓорѓи Јанчевски, како позитивна мерка го оценува последното намалување на цената на благајничките записи од страна на НБРМ и очекува наскоро и банките да ги намалат каматните стапки на кредитите. „Доколку остане стабилноста на финансискиот и на монетарниот систем, веројатно, ќе уследат и мерки на смалување на задолжителната девизна резерва. Нормално е дека каматната стапка на благајничките записи е репер на каматните стапки, што значи дека банките, следејќи ја референтната камата, ќе одат на смалување и на каматните стапки на кредитите“, изјави Јанчевски. Тој нагласи дека намалувањето на каматите на кредитите кај банките е побавен процес, бидејќи банките треба да направат анализи кои видови цени на депозити да ги намалат, зашто врз основа на тоа ги формираат цените на кредитите. (МИА)