Пет години НЛБ Пензиски фонд

НЛБ пензиски фонд вчера прослави пет години од формирањето. „Почнавме како пионери што ја спроведуваа реформата на пензиското и на инвалидското осигурување во Македонија. Имавме задача новиот продукт задолжително пензиско осигурување да го доближиме до граѓаните и да ги убедиме дека тоа е навистина добар продукт. Сметам дека успеавме“, рече претседателот на УО на НЛБ Нов пензиски фонд, Давор Вукадиновиќ, на вчерашната прес-конференција. Тој истакна дека со поддршката на основачите, НЛБ ДД Љубљана и НЛБ Тутунска банка, станале прво друштво во Македонија кое добило дозвола да работи со задолжителни и доброволни пензиски фондови.

„Во текот на овие пет години работење се соочивме со многу ситуации, меѓу кои и со големата економска криза, но, сепак, успеавме да ја задржиме стабилноста. Доказ за стабилноста и довербата се над 114.000 клиенти во задолжителниот фонд, заклучно со 30 април годинава, со над 4,57 милијарди денари средства со кои управуваме“, рече Вукадиновиќ, нагласувајќи дека во доброволното пензиско осигурување НЛБ Пензија плус имаат 2.030 членови.

Директорот на секторот продажба, Петар Талески, рече дека Македонија од 15 јули 2009 година се приклучи кон групата држави што имаат децениско искуство во доброволното капитално финансиско пензиско осигурување. (Ек.Р.)