Рамковски ќе помине само со опомена

Ниту една телевизија не смее самоволно да ја прекине програмата

Светлана Унковска



Поради 24-часовното прекинување на програмата, А1 ќе заработи уште една изречена мерка од Советот за радиодифузија. Самоволието што го манифестираше оваа телевизија во понеделникот со целодневен црн екран, на недозволив начин им го скрати правото на гледачите да ја следат програмата на телевизијата со национална концесија. Од А1 велат дека темниот екран што зрачеше е симболичен израз за состојбата на демократијата во земјава и за односот на институциите кон таа состојба.

Сепак, денеска членовите на Советот на седница ќе расправаат за ваквиот потег на телевизијата со кој директно беше прекршен Законот за радиодифузија. Претседателот на СРД Зоран Стефаноски, вели дека со оглед на тоа што ова е прв пат А1 да ја исклучи програмата, најверојатно, за тоа ќе добие опомена.

„Дефинитивно, ниту една телевизија не смее самоволно да ја прекине програмата. Овој потег на А1 е непромислен и е спротивен на Законот со кој телевизиите имаат обврска да емитуваат програма најмалку 12 часа во текот на еден ден. Казната не му беше изречена да ја исклучи програмата, туку имаше еднодневна забрана за реклами и за телешопинг. Зошто го направи ова, само може да претпоставуваме. Ова е манипулација со јавноста. Не знам која е целта, најверојатно, за да привлече внимание“, вели Стефаноски. Тој потсетува дека мерката забрана за еднодневно емитување реклами е од пред две години и А1 веќе мораше да ја спроведе, но не на овој начин.

„Ваквиот потег никако не му оди во прилог на медиумскиот сервис, затоа што тие мора да ја испочитуваат казната. Затоа што поради непочитување на изречена мерка таа, практично, повлекува и друга уште поригорозна и таа забрана може да достигне и до 3 месеци“, нагласува Стефаноски.

Но, Велија Рамковски, сопственик на телевизијата, во изјавата за „Утрински“ обвини дека изречената мерка е резултат на притисоците на власта кон А1, а вчера казната ја нарече упад во програмата. Но, нема ниту збор за тоа што поради изречената казна за надминување на временскиот лимит на емитување реклами, сопственикот и програмското раководство на телевизијата одлучи да ги затемни екраните, на гледачите им го одземе правото на следење програма.

„Ова е последен потег во континуираниот притисок што во изминатиов период се прави врз А1 од страна на власта. Етикетираше новинари, пишуваше графити, јавно или тајно се праќаа закани за животот, на митинзи народот беше повикуван да не ја гледа и да не и' верува на нашата телевизија. За разлика од другите телевизии, нема да бидеме сервилни и ќе опстанеме во заложбата за објективно информирање“, реагираа вчера од оваа телевизија, додавајќи дека телевизијата се обидувале да ја замолчат и ВМРО-ДПМНЕ и СДСМ.

Стефаноски ги отфрла обвинувањата, а со тоа и инсинуациите дека изречената мерка е диригирана од власта, туку е резултат на спроведување на Законот и воопшто се работи за мерка донесена отпорано.

„Дефинитивно, Советот никогаш не бил под влијание на власта, ние сме независно регулаторно тело, и тоа сме го докажале досега. Инаку, вакви мерки за забрана на емитување реклами им биле изречени и на други телевизии, кои ги спровеле без притоа непотребно да го свртуваат вниманието и да ја манипулираат јавноста како што го направи тоа А1“, истакна првиот човек на СРД, Зоран Стефаноски.