Интервју на политичар на локална телевизија чини 200 евра

СДСМ вчера обвини дека во државата се толерира незаконско работење на некои медиуми, кои, според опозициската партија, наплаќаат за учество на гости во информативна емисија.

Потпретседателот на СДСМ, Гордан Георгиев, на прес-конференција рече дека прилепската телевизија Канал визија, според него, блиска до владејачката ВМРО-ДПМНЕ, за учество во информативна емисија на лидерот на партијата Бранко Црвенковски побарала 200 евра, а за реприза 300 евра. Покрај од ТВ Канал визија до СДСМ изминатите денови пристигнале слични барања од ТВ Кобра од Радовиш и ТРД Златен канал од Крива Паланка. Таквите барања, според Георгиев, се спротивни на начелото за слобода на говор и јавно искажување мислење и за правилно, непристрасно, објективно и навремено информирање на граѓаните. Во ноемврискиот Извештај на Европската комисија за Македонија, една од главните забелешки на Брисел ќе биде состојбата и слободата во медиумите, оцени Георгиев и ја повика власта да не се меша во работата на медиумите и на новинарите.

Прашан за коментар на критиките на спотот нарачан од СДСМ Георгиев рече дека разбира оти употребените материјали се потресни и не секогаш лесни да се прифатат како реалност, но вели дека станува збор за „човечки судбини и состојби што зависат или се предизвикани од политиките на актуелната власт“. На н��винарско прашање дали СДСМ побара согласност од лицата што се појавуваат во спотот, Георгиев одговори дека ваделе слики што веќе биле претставени во медиумите, а по реакциите дел од спотовите се повлечени и се извиниле. (П.Р)