Вестервеле: Правете реформи за преговори

Од нашиот дописник
Тони Гламчевски

Стразбур - Германскиот шеф на дипломатијата, Гидо Вестервеле, му порача на министерот Антонио Милошоски дека во овој момент реформите не се најповолен аргумент за Македонија да го добие тоа што го заслужува - датум за почеток на преговори со ЕУ. Според него, тие ја држат земјата на агендата на ЕУ за во некои поповолни услови да се направи пробив.

„Одржувајте го билатералниот дијалог со Грција. Гледајте ако има можности тој да даде резултат. Истовремено правете ги реформите дома, така како што налага Европската комисија. И држете ги вашето досие и вашите достигнувања на ниво во Брисел. Тоа ви е секогаш силен аргумент што не може да се занемари“, ја пренесе министерот Милошоски пораката што ја добил од германскиот колега.

Милошоски рекол дека очекува Германија да продолжи да го дава својот конструктивен придонес во процесот на евроинтеграциите на Македонија, во согласност со препораките на Европската комисија. Тој на Вестервеле му ја објаснил македонската позиција дека за да се деблокираат евроатлантските интеграции на нашата земја е потребно да се примени словенечко-хрватскиот пристап, односно евроинтеграцијата и процесот на преговорите за името да се одвиваат паралелно.

Милошоски во Стразбур беше распрашуван и од страна на пратениците за проблемот со името. Турскиот пратеник Халук Коч се интересираше за користењето на референцата „поранешна југословенска Република Македонија“, односно „кога Македонија ќе има ново име и кога ќе може да се каже само Македонија“. На ова Милошоски рече дека кога би одговорил, како што би сакал да одговори, ќе станел многу популарен во македонските медиуми. Но, смета дека може да се постигне договор според меѓународното право и воедно да се почитува правото на граѓаните и на нациите да го изберат своето сопствено име.