ВМРО-ДПМНЕ бара појаснувања од Фрчкоски за Глигоров

ВМРО-ДПМНЕ бара одговор од поранешниот министер за внатрешни работи, Љубомир Фрчкоски, во чие време се случи обидот за атентат на поранешниот претседател Киро Глигоров, што мислел да каже со завчерашната изјава дека не си поднел оставка по атентатот поради притисок и политички калкулации.

Цитирајќи ја изјавата на Фрчкоски, портпаролот на ВМРО-ДПМНЕ, Александар Бичиклиски, рече дека Фрчкоски објаснувајќи ја политичката ситуација во тој период, истакнал оти министерот, објективно, е одговорен кога ќе се случи еден ваков настан, дека во нормални околности без размислување би се повлекол од функцијата, но оти тогаш бил извршен притисок врз него и политичките калкулации биле такви дека е подобро да не се прифати неговата понудена оставка и да остане на функцијата.

„Ова отвора многу дилеми. Јавноста заслужува да добие одговор на прашањето поради која причина Фрчковски подлегнал на притисоците, кој вршел притисок врз него да не биде сменет од позицијата министер за внатрешни работи, со која цел и зошто бил вршен тој притисок, кој имал корист од тоа, дали со ова се сакало да се заштитат одредени политички интереси на тогашното државно раководство, дали одредени групации имале заеднички интерес од неефикасната истрага за атентатот и неменувањето на Љубомир Фрчкоски“, праша Бичиклиски. Тој посочи дека обидот за атентат се случи во време кога министер за внатрешни работи беше Фрчкоски, а премиер Бранко Црвенковски, оти Фрчкоски спровел неуспешна истрага и не бил пронајден сторителот. (П.Р.)