Различни давачки за радиодифузна такса

Прашањето за провизиите повторно стана актуелно откако започна наплатата на радиодифузната такса, за која секоја банка бара различна провизија, ама сите ја наплаќаат. Таа се движи од 10 денари, па нагоре. Граѓаните реагираат и велат дека не е фер за сметка од 130 денари за радиодифузна такса да плаќаат уште плус 10 или повеќе.

„За уплатите од страна на обврзниците на радиодифузна такса не е донесена посебна тарифа. Оваа услуга се тарифира согласно со тарифникот за услугите што ги врши во платниот промет Комерцијална банка, по цена што е иста за сите уплати од физички лица што се вршат во готови пари преку интерниот клиринг во рамките на системот на банката.

Уплатата за радиодифузна такса обврзниците може да ја извршат преку кој било носител на платен промет, останатите деловни банки и оваа одлука зависи од личната волја на обврзникот. Во решенијата за наплата на радиодифузна такса издадени од УЈП, Комерцијална банка е назначена единствено како носител на платен промет, депонентна банка каде што е отворена и се води сметката за радиодифузна такса, што во никој случај не значи и не упатува дека задолжително уплатата мора да се врши преку Комерцијална банка“, велат од оваа банка. Оттаму додаваат дека определувањето на висината на надоместоците што ќе ги наплаќа банката за своите услуги е работа на нивната деловна политика. А при нивно утврдување се земаат предвид повеќе фактори, реалните трошоци за платни системи, трошок за работна сила. „Постојат различни тарифи зависно од тоа дали клиентот што го врши плаќањето има сметка во Стопанска банка или не, дали МРТВ ќе отвори сметка во банката или не и дали клиентот користи е-банкинг или не. Имено, како што знаат нашите многубројни корисници на е-банкинг сервисот, плаќањата преку оваа апликација се со значително помали провизии. За воспоставување траен налог, потребно е МРТВ да потпише договор за соработка со банката, а во тој случај пожелно е МРТВ да отвори и сметка во банката, со цел да се намалат провизиите што ќе ги плаќаат клиентите за овие месечни обврски. Банката од минатата година ја нуди можноста сите режиски трошоци да се плаќаат и на банкоматите на банката 24 часа на ден, па очекуваме интересот на компаниите што ги нудат овие услуги да порасне, вклучително и МРТВ“, објаснуваат од Стопанска банка. Оттаму додаваат дека како алтернатива е и можноста да се плаќаат обврските за радиодифузната такса на годишно ниво, со што би се избегнале повторените провизии. (С.М.)