Старата чаршија осветлена со фенери

ПРИЛЕП - Старата прилепска чаршија, споменик на културата, осветлена е со фенери што се вклопуваат во изгледот на овој урбан дел од градот. Со проект на локалната самоуправа, а по претходно одобрение од Управата за заштита на културното наследство, поставени се 24 сијалични места. Искористена е постојната подземна инсталација за да не се нарушува изгледот на Старата чаршија.

„Опфатени се шест улици, кои се поврзуваат со Градскиот саат и со малите попречни сокаци“, изјави градоначалникот Марјан Ристески.

Со проектот за осветлување на Старата прилепска чаршија по 20 години, заменети се 16 канделабри околу Саат-кулата и околу фонтаната.

„Старата чаршија со Градскиот саат е гордост на Прилеп. Наша должност е да ја зачуваме нејзината автентичност зашто е дел од историјата“, додава Ристески.

Од Здружението на занаетчии уверуваат дека и тие ќе се грижат за зачувување на чаршијата.

Вкупната инвестиција за проектот е еден милион денари, од кои 400.000 денари се наменети за осветлување на Старата чаршија, а 600.000 за паркот околу Саат-кулата. (Д.Р.)