Провизиите ги разгневија граѓаните

Навидум ситно, ама не е баш така, 10, 20, 50, па и над 100 денари се движат провизиите што ги наплаќаат банките

Соња Маџовска

Навидум ситно, ама не е баш така, 10, 20, 50, па и над 100 денари се движат провизиите што им ги наплаќаат банките на граѓаните и на фирмите за различни услуги. Огромни се тарифниците што ги имаат банките за што се наплаќаат провизии. Вчера една од банките ни го испрати последниот тарифник што го усвоиле за наплата на провизии и верувале или не, тој има над 50 страници на кои се испишани еден куп дополнителни давачки што ги наплаќаат од граѓаните и од фирмите. Банките, всушност, ги објавуваат овие тарифници и на нивните веб-страници, но ретко некој ги гледа, а потоа кога плаќаме, сите се чудиме. Трошоци за одобрување кредити и кредитни картички, еднократна провизија при исплата, еднаш годишно провизија за обработка, надоместок за пречекорување, надоместоци за промет поголем од одредена сума, трошок за вадење пари од благајна, членарини. Постои провизија за предвремена отплата на кредитот, ��о на трошок на клиентот е и промената на договорот за користење. Списокот е долг.

Највисоки провизии има кога уплатите се вршат од една кон друга банка, каде што, на пример, ако се плаќа над 5.000 денари, банката зема провизија околу 100 денари. За помали суми провизијата е 30 денари, а 20 денари ако уплатата е кон самата банка. Иако порано и кога се плаќаа режиските трошоци банките наплаќаа провизија, сега тој систем се промени поради големите поплаки од граѓаните. Најголем број домашни банки имаат склучено посебни договори со овие компании за бесплатна наплата на струја, вода, парно и за нив не се наплаќа провизија. Не се наплаќа дополнителен надомест ниту за издавање нова сметка.

Големи се провизиите кога се подигнуваат пари од странство или за испраќање средства надвор од земјава. Висината на надоместот зависи од сумата што ја подигнувате или ја уплаќате. Банките наплаќаат трошоци и надоместоци при кредитирање, за услуги во платен промет во земјава и со странство, за девизно работење, за тргување со хартии од вредност.

Дека овие суми што ги заработуваат банките од провизии не се мали покажува фактот што банките по основа на провизии и надоместоци во 2009 заработиле вкупно 60 милиони евра, а лани заклучно со септември 40,7 милиони евра.