„Сведмилк“ почна со исплатата на долгот спрема сточарите
Пелагониските фармери предупредија дека ако денеска не се исплати половината од долгот, повторно ќе стапат во штрајк
Маја Томиќ
Конечно, вчера „Сведмилк“ започна со исплатата на долгот спрема фармерите. Тие вчера во Тутунска банка можеа да си ги земат парите што им се должат за продаденото млеко од август минатата година. Исплатата ќе почнеше и завчера, велат во млекарницата, но тоа не можеше да се оствари поради проблеми со банкарските сметки, па затоа налозите за исплата не можеле да се реализираат. Од млекарницата појаснуваат дека сметката на „Сведмилк“ се' уште е блокирана од страна на Комерцијална банка, додека Охридска банка веќе ја ослободила сметката.
Според Стевче Пивковски, претседател на Штрајкувачкиот одбор на пелагониските фармери, само стотина од нив вчера успеале да земат пари од банка, така што кај нив постои сомневање дека заклучно со денешниот ден ќе биде исплатен 50 отсто од долгот спрема фармерите, како што ветија новите газди на „Сведмилк“. Инаку, како што вели Пивковски, само во пелагонискиот крај има 2.300 кооперанти.
„Ако оди со такво темпо, какво што беше вчера, не ми се верува дека ќе се постигне таа бројка. Дај боже да грешам и да не биде така“, вели Пивковски.
Сепак, иако дел од парите легнаа на сметките на фармерите, пелагониските кооперанти вчераутро поставија ултиматум до новите газди - ако до денеска не им биде исплатена половина од сумата што им ја должи шведската млекарница за изминатите 6 месеци, ќе прекинат понатаму да го предаваат млекото и ќе стапат повторно во штрајк. Сточарите се жалат дека новите сопственици на млекарницата едно им ветуваат, а други применуваат во практика.
„Новиот газда ни рече дека уште завчера ќе почне исплатата, аме еве, пари нема кај сите фармери. Ако до денеска не ни се исплати 50 отсто од долгот, нема веќе да го носиме млекото. Тоа е нашиот став, нема да предадеме ниту капка млеко. А, веќе размислуваме и за нови протести“, изјави Кире Макаловски, фармер од Пелагонија. Сточарите уште еднаш ја потсетија Владата дека треба сериозно да ја следи состојбата со исплатата на млекото и со ветувањата на новите газди.
Во последниот месец цената за литар откупено млеко се движи од 16 до 24 денари. На ниската откупна цена вчера се пожалија и кооперантите на битолската млекарница ИМБ . Тие велат дека во последниот период, ИМБ им исплаќа цена од 8 денари за литар млеко, а од фармерите било барано да потпишат договори за таа цена.
Инаку, новиот сопственик на млекарницата и претседател на „Феникс енерџи“ , Моше Баум, завчера изјави дека до денеска фармерите треба да добијат 50 отсто од долгот, а другата половина најдоцна до 10 март.
Баум рече и дека млекарницата има добри потенцијали и со мали подобрувања и со новиот менаџерски тим, за една и пол година ќе работи со профит. Целта, според него, е да се остане на домашниот пазар, но и да извезува.
„Феникс енерџи“ на 17 февруари официјално ја презеде „Сведмилк“ и наследи долг од речиси 39 милиони евра. Долгот спрема фармерите за откупеното, а неплатено млеко од август лани, изнесува околу 3,5 милиони евра. Тоа беше причината што фармерите во текот на февруари имаа повеќедневни протести и блокади пред „Сведмилк“ и на неколку патни правци.
(Во изработката на
текстот учествуваше и
нашиот дописник од Битола) |
