Проектот „Инвестиции сега“ е добар за целата економија, тврди СДСМ

„Владата го отфрли проектот „Инвестиции сега“ што го промовираше СДСМ пред неколку дена и се обидува да го пренасочи вниманието на медиумите и на граѓаните, затоа што сака да ги скрие предностите на проектот“, изјави вчера потпретседателот на партијата, Зоран Јовановски.

Појаснувајќи го проектот рече оти е добар за секој бизнисмен што сака да инвестира затоа што се намалува трошокот за реализација на бизнис-идеите, се подобрува конкурентноста на производите и услугите на фирмите и продуктивно се користат површините на постојните економски зони, кои, како што посочи, сега стојат неискористени.

„Овозможува побрзо и полесно да излеземе од сегашната катастрофална состојба, бидејќи македонската економија ќе се раздвижи веднаш. Клучниот збор е веднаш. Износот на новоодобрени инвестициски кредити би се зголемил од 60 милиони евра во 2010 година, а на 180 милиони евра во 2011 година. Притоа, бизнисмените што ќе се вклучат во проектот мора да започнат со изградба во рок од три месеци и да го стартуваат новиот деловен објект за 12 месеци“, рече Јовановски.

„Добар е за сите граѓани оти овозможува поголема транспарентност и продуктивност во трошењето на народните пари од буџетот“, рече Јовановски и побара од Владата да објасни зошто не го смета за добар проект. (МИА)