Си легнаа на брашното - бугарските коли ќе се пререгистрираат

Околу 90 отсто од сопствениците на овие возила ќе попуштат и ќе си ги платат давачките

Соња Маџовска


„Ние што не сме пробугарски ориентирани и што немаме бугарски пасоши ќе си ги пререгистрираме возилата, а за оние што се политички обоени, не знам. Добар дел не сме така ориентирани и затоа целосно се оградивме од протестот што беше организиран неодамна пред Владата, а кој повеќе личеше на политички протест“, вели еден сопственик на половно возило, кој го купил во Бугарија.

Тој смета дека оние Македонци што ја искористиле можноста да купат половен автомобил во Бугарија, и тоа најчесто од поевтините, пред либерализацијата на пазарот во земјава за увоз на половни возила, тие ќе ги пререгистрираат овие возила во земјава. Но, оние што се со бугарски пасоши и што се пробугарски ориентирани, нема да го сторат тоа, и од инает, но и поради високите давачки што треба да ги платат во земјава. Тоа особено се однесува на оние што возат скапи автомобили, какви што беа паркирани пред Владата пред десетина дена.

Познавачите велат дека, на пример за „ауди“ произведено во 2000 година, купено во Бугарија, во Македонија за пререгистрација ќе треба да се платат давачки во висина од 10.000 евра.

„За убавите автомобили давачките се високи и сопствениците ќе треба да платат од 5.000 евра па нагоре, во зависност од староста и од типот на возилото. Сметам дека многу од овие возила со бугарски таблички ќе останат нерегистрирани во земјава, бидејќи на сопствениците повеќе им се исплатува да даваат по 20 евра на секои шест месеци за нови таблички во Бугарија отколку тука да платат 10.000 евра за пререгистрација“, велат познавачите.

Откако видоа дека Владата цврсто стои на ставот дека нема да има пролонгирање на рокот за пререгистрација, ниту, пак, ќе има промени на висината на давачките, очигледно е дека сопствениците на возилата со бугарски таблички ќе мора да се помират. Тие имаат само уште десетина дена за да ги пререгистрираат овие возила.

Сопствениците велат дека од вчера се чувствува зголемен интерес за пререгистрација. Тие треба прво кај шпедитерите да ги платат давачките. „Околу 90 отсто од сопствениците на овие возила ќе попуштат и ќе си ги платат давачките. Јас имам такво возило и ќе го пререгистрирам. Е сега, има и такви што сакаат да тераат политика, ама тие се мал број. Има и возила што не ги исполнуваат ни основните технички услови и тие, исто така, нема да можат да се пререгистрираат во Македонија и ќе мора да се вратат од земјите од каде што се купени“, вели нашиот соговорник. Тој сега ќе треба да плати царина, ДДВ, акцизи и хомологација, а потоа и регистрација.

Од Царинската управа потврдуваат дека има зголемен интерес на царинските терминали, со оглед на тоа што на 30 септември не истекува само рокот за пререгистрација на возилата со странски регистарски таблички туку истекува и рокот за увоз на половни возила со Еуро1 стандард. Доколку некое возило не е пререгистрирано, по потврда од Царината дека престојувало во земјава повеќе од 6 месеци, следува казна од 100 евра до негово одземање. Инаку, очигледно е дека полека спласна интересот за половните автомобили. Овој месец се увезуваат, главно, половни возила со Еуро 1 стандард за да се фати крајниот рок за увоз на овие возила, кој истекува на 30 септември. Во првите 12 дена од септември биле донесени 1.664 половни автомобили. Поконкретно, заклучно со 12 септември во земјава, од почетокот на годинава се увезени 47.238 автомобили. Од нив, дури 39.000 се половни, а само 5.141 се нови возила.