Втора жртва на новиот грип

Пациентот починал на КАРИЛ, па не е исклучено пандемскиот грип да е влезен и меѓу болните на клиниките

Јасмина Јовановска

Новиот грип ја зеде и втората жртва. Тоа е 72-годишен маж од Скопје, кој по неколкудневно лекување на неколку клиники и по влошување на здравствената состојба завршил на Клиниката за анестезија, реанимација и интензивно лекување (КАРИЛ), починал пред три дена. Поради тоа што пациентот бил шетан на неколку клиники во потрага по дијагноза, не е исклучено од пандемски грип да се заразени и други болни на клиниките. Уште еден пациент што бил сместен на КАРИЛ веќе е префрлен да се лекува на Инфективната клиника, поради сомневање дека и тој заболел од новиот грип. Не е исклучено да има и други заразени болни.

Починатиот пациент со години бил болен од хронично заболување на белите дробови (ХОББ) и со срцева слабост, поради што како нивен пациент првично бил сместен на Институтот за белодробни заболувања и туберкулоза, со индикација дека му се влошила болеста. Откако по препишаната терапија не му се подобрила состојбата болниот бил префрлен на Клиниката за пулмологија. Но, и овде многу не му помогнале по што болниот западнал во многу тешка состојба и во саботата бил итно префрлен на КАРИЛ каде што го поставиле на апарати за вештачко дишење. Дури по два дена, во понеделникот, му бил земен брис за новиот грип. Но, за жал, пациентот починал попладнето, без да се знае дека се заразил со новиот грип. „Два дена подоцна се дозна дека починатиот бил болен од новиот грип, зошто тогаш се добиени резултатите и затоа дури сега се соопштува за втората жртва на новиот грип“, објаснува д-р Јованка Костовска, претседателка на Комисијата за пандемски грип. Таа тврди дека се преземени сите мерки за дезинфекција на клиниките каде што престојувал болниот, но дури два дена по неговата смрт кога биле готови резултатите од лабораториското испитување. Изолирани се и пациентите што биле во контакт со починатиот и на нив им се земени брисеви за пандемски грип. На пациентите од ризичните групи и за други болни за кои имало потреба даден им е антивирусниот лек „тамифлу“.

Комисијата допрва ќе испитува дали пациентот починал поради тоа што не бил соодветно лекуван, со оглед на тоа што никој од лекарите не помислил дека може да има и грип. „Апелираме до лекарите од клиниките кога ги лекуваат болните да помислат и на тоа дека може да се заразени и од пандемски грип“, укажува д-р Костовска.

На Инфективната клиника вчера се примени шест нови сомнителни случаи, од кои едниот од нив е болниот од КАРИЛ. Заедно со него и со 55-годишната жена на клиниката моментно има двајца пациенти што се во критична состојба и се приклучени на респиратор. Моментно на клиниката се лекуваат околу седумдесетина пациенти. Досега во Македонија се регистрирани 694 заболени од новиот грип, од кои 90 отсто се излекувани.

Во меѓувреме, вакцинирањето на здравствените работници продолжува и покрај тоа што кај некои лекари има отпор. На прашањето зошто се врши притисок врз лекарите да потпишат изјави дека одбиваат да се вакцинираат и оти трошоците за евентуалното боледување нема да им го плати болницата каде што се вработени, министерот за здравство Бујар Османи вели дека е многу логично да се бара изјава, но не е сигурен дека е во таква форма. Директорот на Инфективната клиника, д-р Звонко Миленковиќ, пак, не беше прецизен дали во изјавата што ја потпишуваат лекарите е наведено оти трошоците за боледувањето ќе си ги платат сами, туку само дека им е укажано кои се последиците доколку не се вакцинираат. Досега, според министерот, во државата се вакцинирани над 500 лекари, и тој се надева дека вакцинацијата кај здравствените работници ќе се интензивира во наредниот период, зошто заклучок на комисијата е дека вакцинирањето е најефикасниот начин за борба против оваа пандемија.

На Министерството за здравство никако да му тргне со регуларната набавка за вакцините против новиот грип. Поради несигурноста дали добавувачот „Кемофарм“ навреме ќе ги донесе бараните количества, министерот Османи моли за вакцина повеќе во европските земји. „Дваесет илјади дози вакцини се директно набавени од фармацевтската компанија ’Бакстер‘ по цена од 9,5 евра и тие во Македонија ќе пристигнат за неколку дена“, изјави министерот Османи, кој потенцира дека станува збор за една од најсоодветните вакцини токму за ризичните групи. Вакцината не содржи подлога ниту, пак, жива. „Набавени се со помош на лобирање во некои европски земји“, рече Османи.

Прашање е на денови, укажа министерот за здравство, кога ќе пристигнат вакцините и во заводите, односно центрите за јавно здравје каде што треба да се јават граѓаните од ризичните групи за да се вакцинираат. Тоа се децата до возраст од 36 месеци, хронично болните и бремените жени.

Комисијата с е' уште се колеба дали да ја поништи одлуката од тендерот за вакцините нарачани од „Новартис“. Комисијата, како што објасни министерот Османи, не постигнала консензус и побарала дополнително неколку дена да се утврди кој ќе биде одѕивот и заинтересираноста на граѓаните за вакцинација, па да одлучи што ќе прави.

„Битно е во секој момент да има вакцини. Сега се трошат 5.000 дози, а има и други алтернативни опции за дополнителни 20.000 дози. Ќе има вакцини за сите што ќе сакаат да се вакцинираат“, уверува првиот лекар во државата и додава дека динамиката на испорака е многу битна. Вакцинацијата е најефикасен начин за заштита на граѓаните, посочи Османи. (Ј.Ј.)