Цаца не се откажува од трката за врховен судија
Министерот за правда не знае која е причината за повлекувањето на Родна Живковска
Гордана Дувњак
Професорката по граѓанско право, Родна Живковска што пред неколку дена беше избрана за судија во Врховниот суд, денес нема да се појави на давањето свечена заклетва на новоизбраните судии во Судскиот совет. Само три дена по изборот, несудената врховна судијка се премисли и реши да поднесе оставка на новата функција. Писмената оставка стасала во Советот уште во петокот, од каде што засега нема одговор дали таа ќе биде разгледана уште на денешната седница, за да може да се отвори простор за објавување нов конкурс.
Ова ќе биде трето огласување на последното слободно место во највисокиот суд во државата. Дали новиот обид ќе и' донесе трета среќа на поранешната европска судијка Маргарита Цаца Николовска која, и покрај своето големо меѓународно искуство и минатиот труд во Врховниот суд, сепак, двапати не успеа да го помине филтерот на членовите на Судскиот совет. И покрај шокот од скандалозната одлука од нејзиниот неизбор, Николовска најавува дека не се откажува од трката да стане нов врховен судија.
„Ми требаше малку време да се соземам, но продолжувам натаму“, ни рече вчера во кусиот телефонски разговор екссудијката во Европскиот суд за човекови права во Стразбур, каде што помина девет години.
Политичката гарнитура сака комплетно да го партизира судството, обвини судијката Маргарита Цаца-Николовска во интервју за ТВ А2 .
„Во македонското судство се случуваат многу работи, неубави работи. Најпрво, не одлучува Врховниот суд, туку Судскиот совет за тоа дали јас ќе бидам избрана или не. Судскиот совет и министерот неколку пати во јавноста изнесоа свои видувања дека јас треба да бидам во редот на Врховниот суд, не поради мојата индивидуа, туку како некој што порано бил дел од Врховниот суд и како некој што поминал девет и пол години во Судот за човекови права во Стразбур, изјави Цаца.
Министерот за правда, Михајло Маневски, пак, вчера по се' погласните критики упатени на изборот и начинот на кој се заземаат судските функции, изјави дека судството не е партизирано. Тоа што Цаца-Николовска повторно извиси и испадна од трката за врховен судија, според министерот, не значело дека судството е длабоко партизирано.
„Од еден случај да се влече заклучок дека станува збор за партизација на судството, мислам дека не е основано“, изјави Маневски. Тој истотото го тврдеше и кога адвокатот Јован Вангеловски во мај стана врховен судија. Но, и покрај тоа што токму министерот за правда по првиот неизбор и' советуваше на Николовска повторно да се јави на конкурсот, беше избрана професорката Родна Живковска. „Која е причината за повлекувањето на Родна Живковска мислам дека би било добро да ја прашате неа. Јас немам информации зошто таа го направи тој чин“, рече Маневски.
Официјалните причини за оставката на Живковска се дека тоа го прави од семејни причини, но неофицијално се говори дека главниот мотив се неисполнетите ветувања. Наводно, од високи партиски извори во владејачката ВМРО-ДПМНЕ на Живковска и' било ветено местото претседател на Врховниот суд. Но, и покрај тоа што конкурсот за избор на последниот врховен судија беше во тек, Судскиот совет побрза со изборот на претседател. Со тоа и' беше скратена можноста Живковска да биде еден од противкандидатите на адвокатот Јово Вангеловски, (кум на претседателот на Собранието, Трајко Велјаноски), кој важеше за главен фаворит за ова место. Ова не е прв пример за повлекување професорски кадар поради незадоволени претседателски амбиции во судството. Во октомври 2006 година, по изборот на уставен судија, оставка поднесе и професорот Миодраг Мицајков, наводно, од лични причини.
|
