Нема наставници за велешката паралелка на албански
ВЕЛЕС - На првиот училиштен час во новата паралелка во велешката гимназија „Кочо Рацин“, во која прв пат годинава треба да се изведува настава на албански јазик, вчера дојдоа 28 ученици. Но, нема предметни наставници на албански јазик.
Досега во гимназијата се примени само двајца наставници кои ќе предаваат на албански. Конкурс за професори нема да биде распишан, а новите ќе бидат примени со договор на дело. Досега од пријавените кандидати условите ги исполниле само двајца. Тие на учениците ќе им предаваат математика, физика и албански јазик, а за другите предмети нема соодветен кадар.
„Останува да се реализира договорот што го постигна Министерството за образование и локалната самоуправа. Во следниот период ќе бидат примени нови професори, но само ако имаат завршено високо образование за предметите што ќе се изучуваат според наставната програма“, вели Стефанка Богоевска, директорка на гимназијата.
Дел од родителите реагираат зошто во новата паралелка нема наставници, а други сметаат дека проблемите ќе се решат со текот на времето.
„Сакам моето дете да учи на албански. Ако тоа не е можно во оваа гимназија, детето ќе го отпишам и ќе го запишам во некоја друга“, истакнува Самит Белуров. (С.Ќ.Н.) |
