За два часа продадени 2.000 дреса на Роналдо, а украдени 300
Роналдоманија владее во Мадрид. Повеќе од 2.000 дресови на Кристијано Роналдо се продадени само за два часа во официјалната продавница на „Сантијаго Бернабе“. Огромната турканица ја искористија и крадците, кои однесоа дури 300 дреса.
Според, шпанските медиуми, колоната на обожувачи на Роналдо се формирала веднаш по неговото претставување. Иако беше кажано дека во продавницата ќе се пуштаат само по 15 навивачи одеднаш, ниту полицијата не можеше да ги задржи залудените фанови.
Инаку, вчера најскапата инвестиција на Реал (М) им вети на навивачите дека ќе биде помалку себичен во однос на својата игра во Јунајтед.
„Тука ќе видите еден поинаков Роналдо. Како минуваат годините, така и себичноста и егоизмот опаѓаат. Некогаш мислев само на голови, но работите се менуваат“, изјави Роналдо, кој се обиде да ја спореди Премиерлигата со Примера.
„Во Англија се игра побрзо и треба да си физички максимално подготвен. Немаш ни секунда простор. Во Шпанија се игра повеќе со топка и убавината на играта повеќе доаѓа до израз. Затоа, мислам дека многу бргу ќе се вклопам во составот на Реал“, додаде Роналдо, кој е одушевен од тоа што можел да се запознае со Ди Стефано. „Голема чест е да разговараш со него. Ќе го носам бројот девет, кој е митски. Ја сакав седумката како во Јунајтед, но неа ја носи Раул, кој ги испиша страниците на клупската историја. Освои се' што можеше со Реал. Ќе ми биде задоволство да играм со него“.
Лусио блиску до манЧестер Сити
Претставници на Манчестер Сити веќе се во Минхен на преговори за дефанзивецот Лусио (31). Германските медиуми пишуваат дека и капитенот на Бразил сака да си замине, како и новиот тренер Луис ван Гал, кој сака да го замени Лусио со Едсон Брафејд.
Хашек нов селектор на Чешка
Репрезентацијата на Чешка до крајот на квалификациите за СП 2010 ќе ја води Иван Хашек, претседател на Фудбалската федерација. Тој ќе го наследи привремениот тренер Франтишек Страк, чиј договор истече на 30 јуни и не му беше обновен. Хашек (45) е бивш репрезентативец на Чешка. Работеше како тренер во неколку земји, а минатиот месец стана претседател на Федерацијата. |
