Надал во шок по смртта на Монкур
Рафаел Надал, до пред некој ден светски рекет број 1, е во шок поради веста за смртта на неговиот пријател Матје Монкур, кој трагично почина во својата 24 година од животот. Овие двајца тенисери растеа заедно на јуниорските турнири ширум светот. Монкур моментно беше на 119. место на АТП листата, а минатата недела играше во полуфиналето на АТП Челенџерот во Риека. „Не можам да поверувам. Почина нашиот пријател Монкур“, соопшти Надал преку својата интернет страница.
Инаку, младиот тенисер во безживотна состојба покрај собниот велосипед го нашла неговата девојка. Причината за смртта не е позната, а се очекуваат резултатите од обдукцијата. Монкур токму во понеделникот почна да ја одработува петнеделната суспензија, која поради обложување му ја изрече АТП. Неговите обложувања беа само детска игра. Тврдеше дека никогаш не вложил повеќе од две евра, а му докажаа дека во 2005 година вложил вкупно 134 евра на 36 тениски меча. |
