Чејни нуди поддршка за Грузија, ја напаѓа Русија
ТБИЛИСИ - Американскиот потпретседател Дик Чејни вчера вети дека ќе застане на страната на Грузија во нејзината пресметка со Русија, опишувајќи го воениот напад на Москва во поранешната советска држава како „нелегитимен“ чин што наметнува сериозни сомневања за нејзината сигурност.
Чејни, еден од најострите критичари на Москва, е највисоко рангиран американски претставник што ја посетил Грузија откако Тбилиси се обиде со сила да го преземе отцепениот регион Јужна Осетија на почетокот на август, и беше прегазен од руската војска. Неговите вообичаено остри коментари веројатно ќе го налутат Кремљ, кој го обвини Вашингтон дека ги разгорува тензиите охрабрувајќи го грузискиот претседател Михаил Саакашвили, правник образуван во САД кој е тесно поврзан со администрацијата на претседателот Џорџ Буш.
„Откако вашата земја извојува слобода со револуцијата на розите, Америка ја помогна таа храбра млада демократија“, изјави Чејни за новинарите, мислејќи на мировната револуција во 2003 година со која Саакашвили дојде на власт. „Ние повторно го правиме тоа додека вие се обидувате да ја надминете инвазијата врз вашата суверена територија, и нелегитимниот, унилатерален обид да се сменат границите на вашата земја со сила, што беше универзално осудено од слободните земји“, рече Чејни, кој стоеше веднаш до Саакашвили при неговата прва посета на Тбилиси.
Чејни, кој е во посета на американските сојузници во регионот, што започна во средата во Азербејџан, рече дека акциите на Русија наметнаа „сериозно сомневање“ за нејзините намери и сигурност како партнер, и во регионот и на меѓународната сцена. И Азербејџан и Грузија се врски во синџирот на енергетскиот коридор, поддржан од Запад, што ја заобиколува Русија, при што Запад стравува дека би можел да биде изложен на опасност по воениот упад на Кремљ во Грузија. (Ројтерс) |
