Започна изградбата на меморијален центар посветен на жртвите од нападите во САД
Замислено е околу комплексот да бидат изградени четири помали и еден централен облакодер, кој ќе биде наречен Кула на слободата, со висина 541 метар
Њујорк - Во Њујорк започна изградбата на меморијален центар, посветен на жртвите од терористичкиот напад врз Кулите близначки на Светскиот трговски центар, кој беше извршен на 11 септември 2001 година.
Првиот елемент кој е поставен беше камен столб со височина од 7,5 метри и тежина од 3.500 килограми.
Околу споменикот е предвидено да се наоѓаат два базена со длабочина од 18 метри, околу кои ќе има вештачки водопади и 400 дабови дрва, кои ќе бидат засадени во парк на три хектари. Двата базена ќе бидат поставени на истото место каде што се наоѓаа урнатите кули. Ќе се изгради и музеј посветен на 3.000-те жртви во нападот. Замислено е околу комплексот да бидат изградени четири помали и еден централен облакодер, кој ќе биде наречен Кула на слободата. Височината на оваа кула ќе биде 541 метар. Проектот е дело на архитектот Дејвид Чајлдс.
Меморијалниот комплекс ќе биде завршен за три години, а вредноста на овој проект ќе изнесува 610 милиони долари. |
