Грција во сериозна политичка криза
Атина - Политичката криза во Грција се задлабочува, а јавноста продолжува да биде отфрлена од она што се случува на политичката сцена, пишуваше вчера атинскиот весник „Пондики“.
Весникот го објави социолошкото истражување на агенцијата „Метрон Анализис“, од кое јасно се гледа дека и покрај предноста од 2,4 проценти на владејачката партија Нова демократија пред опозициската ПАСОК (28,3 отсто наспроти 25,9 проценти според последните анкети), двопартискиот модел е „истрошен“, а „корупцијата и разочарувањето“ владеат во земјата.
Сите печатени медиуми им посветуваат најголемо значење на внатрешнопартиските превирања во владејачката политичка сила Нова демократија. Нејзиниот пратеник Петрос Татулис побарал оставка на владиниот портпарол Теодорос Русопулос поради тоа што неговата сопруга води медиумски бизнис.
Весникот „Етнос“ смета дека тоа е следната „ракета“ во дворот на Владата, која може да го наруши и онака слабото мнозинство на конзервативците, кои бројат 152 пратеници во 300-члениот Парламент.
Поради тоа, јавноста го сврти погледот кон премиерот Костас Караманлис, од кого се очекува за време на отворањето на Меѓународниот солунски саем на 6 септември да најави цврста намера за продолжување на реформите како единствен излез за земјата, објави весникот „Врадини“.
„Подготвени сме да управуваме и да ја извлечеме земјата од сегашната криза“, ја пренесува изјавата на лидерот на социјалистите Јоргос Папандреу весникот „Ники“.
Тој истакна дека изборите за Европски парламент идната година ќе бидат вистински референдум за владиниот кабинет. Во својот говор по повод годишнината од формирањето на партијата ПАСОК, Папандреу додаде дека „и' дошол крајот на владата на Караманлис“. |
